مبروك عطية: "إحنا في زمن البنت بيتكسر فيه جناحها"

محمد هيثم

رد الدكتور مبروك عطية، أستاذ الشريعة الإسلامية بجامعة الأزهر، على سؤال من متابعة، جاء فيه: “لدي ولد وثلاث بنات وأحب الولد أكثر من البنات.. فهل هذا حرام؟”.

أجاب “عطية” خلال مقطع فيديو نشره على قناته الرسمية على موقع “يوتيوب“: “الحب لا حرمة فيه، والقلوب بين أصبعين من أصابع الرحمن يقلبها كيف يشاء”، تابع: “حرام عليكي أن حبك يخليكي تزوديه في العطاء عن أخواته البنات، تقربيه أكثر منهم، تحسسيه أنك مخلفتيش إلا هو فيؤثر ذلك في نفوس البنات”. 

نرشح لك: خالد الجندي: الناس تجاوزت مرحلة الطلاق الشفوي

أضاف: “عبقرية المسلم إذا أحب لا يظلم، بتقولي له يا روح ماما تقولي لكل بنت يا روح روح ماما، بتبتسمي في وشه تبتسمي في وشوشهم، اتقوا الله واعدلوا بين أولادكم مش في الحب، الحب ده بتاع ربنا”. 

واصل: “إحنا طبعا عندنا أمية في كل حاجة حتى في الحب، لما نحب حد  بنفضح الدنيا، منقولش بحبك إلا له ونقربه وندلعه، ده اللي هيحاسبك عليه ربنا، ربنا في آخر سورة الشورى قال (يَهَبُ لِمَنْ يَشَاءُ إِنَاثاً وَيَهَبُ لِمَنْ يَشَاءُ الذُّكُور)، جاب الذكور نمرة 2 وبدء بالإناث، البنت حبيبتك وقطعة من أحشائك زيها زي الواد”.

أردف: “إحنا في زمن البنت بيتكسر فيه جناحها، أن مكنتش أمها ترفع جناحها وتقرب منها وتحسسها أنها هدية من ربنا، فكري فيما في يدك واتقوا الله”.