"مكانتش وفاة طبيعية".. رامي صبري يكشف الأسباب الحقيقية لوفاة شقيقه

محمد هيثم

أوضح الفنان رامي صبري، الأسباب الحقيقية لوفاة شقيقه، والتي بسببها تقدم بطعن ضد التقرير الطبي لوفاته.

قال “رامي” خلال لقائه مع “ET بالعربي“: “كريم الله يرحمه توفى لأسباب الناس أكيد سمعت عنها وفيه منها غلط ومنها صح، إحنا جالنا بقى كعيلته تقرير طبي لوفاته مكانش عاجبنا والمحاميين طعنوا عليه، وده حقه علينا لأنه راح لسبب وفجأة توفى تاني يوم لسبب تاني، فمكناش فاهمين فيه إيه”.

نرشح لك: كلمات أغنية “هموت من غيرها” لـ رامي صبري

أضاف: “كنا عاوزين نفهم قانونيا هو مات ليه أصلا وده حقنا كعيلته، إحنا ماشيين في الموضوع قانوني وإن شاء الله حقه هيجي بالقانون، في أشياء حصلت شوفتها عليه وإحنا بنودعه الوداع الأخير مش موجودة في التقرير، لما التقرير جه بعد أربع شهور كان فيه تقصير شويتين حلوين، إحنا حسينا إن فيه حاجة مش مظبوطة”.

تابع: “لقينا التقرير ورقتين وفيه تفاصيل وحسينا التفاصيل دي مش لايقة على اللي إحنا شوفناه، في ناس بتتكلم كتير مش فاهمة، لكن وفاته مكانتش وفاة طبيعية إحنا عايزين نتأكد الوفاة دي حصلت بسبب ناس ولا بسبب أحداث؟ ممكن تبقي أحداث خلته يتوفي”.

أشار: “نفسي الصحافة يبقي عندها حتة احترام حرمة الميت، لأن أثناء موضوع كريم شوفت حاجات كانت صعبة أوي، حتى في ناس كتير أنا قاطعتها، ومبقتش أرد على حد ومكنتش كدة خالص، أنا حسيت إن هما مش شايفيني هما شايفين إن أنا أعمل انفراد وأروح مكان الحادث، ماحسوش إن رامي ده أخونا وفنان مصري محترم نقف في ضهره”.

كان المطرب رامي صبري أنه تقدم بطعن على تقرير الطب الشرعي الخاص بوفاة شقيقه كريم، الذي توفي في يوليو الماضي.

نشر صبري على حسابه عبر فيسبوك، صورة له مع شقيقه الراحل، معلقا: “تقرير الطب الشرعي لحالة وفاة أخي الغالي كريم سيتم الطعن عليه بلجنة ثلاثية.. اللي فاهم إن حق كريم هيروح يبقي بيحلم وميعرفنيش، هاخد حقه وبالقانون.. وفي عهد رئيسنا سيادة الرئيس عبد الفتاح السيسي كل واحد هياخد حقه بالقانون..

أخي الغالي كريم: أقسم بالله أقسم بالله حقك هجيبهولك، الله يرحمك ويغفر لك”.

وكان قد تذكّر الفنان رامي صبري شقيقه الراحل كريم، بعد مرور شهر على وفاته.

نشر رامي على حسابه عبر فيسبوك صورة جمعته بشقيقه، وكتب: “شهر علي فراقك يا كريم يا حبيبي يا غالي، والله يا ابني ما قصرت معاك.. مش عارف استوعب انك مبقتش موجود والله، وحشتني اوي.. لا اله الا الله ربنا يرحمك”.

يذكر أن آخر أعمال الفنان رامي صبري أغنية “بيحرك في المشاعر”، وكانت من ألحان عزيز الشافعي، وتوزيع وسام عبد المنعم، وكلمات تامر حسين، وإخراج مصطفى حسين.

وفي وقت سابق، كان قد طرح دويتو غنائي جمع بينه وبين شقيقه الراحل كريم صبري، بعنوان “حالة اكتئاب”، عبر قناته الرسمية على موقع الفيديوهات “يوتيوب”.

أوضح صناع الأغنية في بدايتها أن العمل إهداء إلى روح كريم صبري، إذ لم يتقاضى أي شخص عائد مادي عن الأغنية.

“حالة اكتئاب” كلمات عبير الرزاز، ألحان كريم صبري، توزيع محمد عاطف الحلو.