هبة العفيفي تكتب: وما حياتك إلا.. سكرين شوت
الحياة ورا شاشات الكمبيوتر على قد ما بقت ممله على قد ما بقت منفذ لناس كتير ووسيله عشان تتعرف بيها على ناس تانية كتير بردوا الملل يشغل حيز كبير من حياتهم .
في ناس بتصاحب من الانترنت وفي صداقات بجد بتحصل وفي شغل بيكمل وحياة ودنيا كبيره وناس وعالم .
المشكله مش في كده.. المشكله اننا راضيين نتحط جوه الدايره دى ومصدقين انها حياه بجد .. المشكله ان في ناس بتبقى قاعده مع ناس حقيقيين وبجد ومصدقين انهم عايشين لوحدهم لحد ما يفتحوا اى اكونت ليهم على اى ابليكيشن ..
في ناس بتقيم تواجدهم وشهرتهم بكام لايك على كلامهم وكام لايك على صورهم ..
في ناس بتتحول لشخصيات عامه وبيتعملها برامج عشان هما مشهورين على السوشيال ميديا وده مش غلط بس مش صح .
حياه الانترنت حلوة بس ميتمحورش حواليها حياتنا كلها ..انت بتعرف اخبار الناس حتى اللى مش عايز تعرفها ..لو ماخدتش صوره كل يوم بتحس ان في حاجه ناقصاك .. في ناس بتعرفها بقالك سنين ولو شوفتها في الشارع صدفه مش هتعرفها مع انك بتكلمهم كل يوم وبتفتح حوارات ونقاشات وساعات بتحكيلهم مشاكلك وبيشاركوك في حلها .
الموضوع وصل لدرجه انك لما بيجيلك رساله شكر مثلا عن حاجه حلوه كتبتها بتعملها سكرين شوت عشان تثبت لنفسك ولصحابك ان فلان شكر فيك او شتمك او حتى اتكلم معاك.
السكرين شوت بقى حاجه اساسيه ووسيله ساعات للتهديد والهزار والضحك وفضح الخصوصيات.
لو واحد هزر معاك او قالك كلمتين مجامله او حب يتعرف او حب يستظرف اول حاجه بتعملها سكرين شوت سواء هتستخدمها او لا!
في ناس بتاخد سكرين شوت لكلامها مع الناس اللى بتحبها وساعات بيبقى دليل انك في يوم من الايام كان في مشاعر بينك وبين حد حتى لو علاقات فاشله .
تواجدك على الفيسبوك بالساعه والتاريخ بيتاخدلها سكرين شوت
بوست شيرته بيتاخدله سكرين شوت
رأى قولته بيتاخدله سكرين شوت
صوره ليك بيتاخدلها سكرين شوت
رايك عند بروفايل صحابك بيتاخدله سكرين شوت
حياتك كامله بيتاخد لها سكرين شوت
عايز تعرف مين فين ورايح فين دور في بروفايله المزيكا اللى بيسمعها الاماكن اللى بيحبها العلاقات اللى مر بيها فرحان ولا زعلان شغال ولا عاطل كله متاح وسكرين شوت للذكرى.
في ناس بجد بقت عايشة في بروفايلاتها وبس، ومن غيرها ، ملهاش حياة، ملهاش وجود
اطلعوا بره العالم الموازى وارجعوا للحياه ..كلموا الناس اللى وحشاكوا مش بس تعملوا لايك
سيبوا الناس في حالها بلاش سكرين شوت لحاجه ماتخصكش سيب الناس في حالها وخليك في حالك
افهموا ان السكرين شوت ده مرض نفسي جديد لازم نتعالج كلنا منه …ربنا يشفينا!