خيري رمضان عن مؤمن زكريا: "مضايق من شائعات الوفاة"
كشف الإعلامي خيري رمضان، عن إجرائه اتصالا هاتفيا اليوم بنجم المنتخب والأهلي السابق مؤمن زكريا، للاطمئنان على حالته بعد انتشار شائعات وفاته.
قال “رمضان” عبر برنامج “حديث القاهرة”، مساء السبت، على قناة “القاهرة والناس“: “أنا كلمت مؤمن زكريا النهاردة وسألته لو عايز يوصل رسائل، وقالي إنه مش حابب يعلق وصوته تعبان وحزين ومضايق من الناس اللي بطلع عليه شائعات”.
نرشح لك: زوجة مؤمن زكريا لمطلقي شائعات وفاته: راعوا نفسيته
وجه رسالة لمروجي الشائعات، قائلا: “احترموا الإنسانية والخصوصيات ولا موت مؤمن زكريا هيسعدنا ولا هيسعد أي حد ولا الشائعة هتكسبكم حاجة”، مؤكدا أن مؤمن زكريا لاعب خلوق والجماهير تحبه وأسعدنا كثيرا مع الأهلي والزمالك والمنتخب.
أبدى الإعلامي خيري رمضان، تعجبه من مروجي الشائعات وتساءل: “في ناس قعدة كل شويه تطلع شائعات إن مؤمن زكريا مات وكلنا هنموت، ولكن إيه المناسبة إن حد يستخف بمشاعر أسرة زوج وزوجة وأولاد، ومؤمن زكريا مريض ومبتلى وكم اسعدنا فى المنتخب”.
كانت ريهام الشيمي، زوجة اللاعب مؤمن زكريا لاعب النادي الأهلي ومنتخب مصر السابق، علقت على الشائعات التي انتشرت حول خبر وفاته، على وسائل التواصل الاجتماعي.
قالت “الشيمي” خلال اتصال هاتفي في برنامج “يحدث في مصر” مساء اليوم الخميس المذاع على قناة “MBC مصر” ويقدمه الإعلامي شريف عامر: “هو زي الفل وكويس، ومش عارفة ليه كل ما يفرح الناس تنكد عليه، لسه الجمهور جاي له أمبارح، فرح جدا وإحنا مكناش نعرف أن الجمهور جاي وكانت مفاجأة”.
تابعت: “كانوا جايين يحتفلوا معاه ببطولة السوبر، ودي حاجة جميلة جدا، ومش عارفة ليه الناس تنكد عليه كدا النهاردة، هيستفادو إيه لما يعملوا حاجة زي كده؟”.
أضافت: “هو الحمدلله كويس، وحالته الصحية كويسة، والمفروض كان هيسافر إنجلترا والدكتور مستنيه هناك، بس مقدم على الفيزا ولسه مطلعتش”.
أضافت: “كنا بنتفرج على الماتش وكان مبسوط جدا ومش متوقعين الجمهور يجي تحت البيت، وكان فرحان بالجمهور جدا، وبتمنى من الناس اللي بتنزل الحاجات دي تراعي بس نفسيته”.