التصريحات الكاملة لـ الرئيس "السيسي" عن المشروعات الجديدة للطاقة
الرئيس عن المشروعات الجديدة للطاقة
شهد الرئيس عبد الفتاح السيسي، قبل قليل، افتتاح عدد من المشروعات التابعة لقطاع الكهرباء في أسوان.
وخلال الافتتاح أدلى الرئيس “السيسي” بالعديد من التصريحات حول المشروعات الجديدة وتكلفتها ومدى أهميتها.
وجاءت أبرز تصريحات الرئيس “السيسي” كالآتي:
1- احنا ماشيين في اتجاه إن عايزين مصر فيما يخص الطاقة الكهربائية سواء كان إنتاج أو توزيع أو تحكم زيها زي أي دولة متقدمة جدا في المجال، ده اللي خلانا لما نيجي نتكلم عن ربط كهربائي مع دول الجوار نقدر نعمله، لأن العالم كله رايح لكده.
2- هو المشكلة في 2013 و2014 كانت إننا ننتج كهرباء بس؟ لأ.. ده المشكلة كانت إننا ننتجها وننقلها ونسيطر ونخلي جودة توزيعها عالية.
3- الكهربا غالية مش عشان احنا عايزين نغليها عليكوا، لكن أنا دايما بقول اللي احنا بنعمله ده مستهدفين منه نحصله ولا لأ؟.. لو بنحصله يبقى احنا ناجحين، لو مش بنحصله هيبقى فيه عجز الدولة تتحمله، والدولة لا تستطيع تحمل أعباء المشاريع دي لأنها أعباء ضخمة جدا.
4- كان قدامنا خيار من اتنين نقول موضوع الكهرباء ميتحلش، وفيه دول بقالها 15 و20 سنة عندها مشكلة في الكهرباء محلتهاش أو إن احنا نحلها، لأن كنا شايفين إن الأمن القومي في مصر ممكن يتأثر بالحكاية دي، ثم إننا نبقى دولة ذات شأن وننمي أنفسنا وندي فرصة للقطاع الخاص والاستثمارات والصناعة إنها تنمو أو تستقر على الأقل لأن لو مفيش كهرباء الناس مش هتشتغل والمصانع هتتقفل.
5- الاهتمام مش كلام.. يعني اديك قرشين صغيرين 100 جنيه ولا 150 جنيه وأسيبك كده لا كهرباء ولا مية ولا صرف صحي ولا طرق؟.. ايه ده! أضحك عليكم!.. ده الأرقام اللي اتحطت للصعيد فوق التريليون و100 مليار جنيه في الكام سنة دول ولسة شغالين.
6- الإعلام مهم إنه ياخد البيانات دي، وإذا كان محتاج إنه يبسطها أكتر من كده بالتنسيق مع وزارة الكهرباء ميجراش.. عشان الناس تعرف إيه اللي اتعمل، وإيه اللي بيتعمل لهم، عشان في النهاية هو يجد الخدمة دي بالشكل المناسب.
7- في ناس اشتكت لي إن قراءات العدادات مش مظبوطة.. عشان كده ياريت كل عداداتنا اللي موجودة في الدولة المصرية تبقى عدادات مسبقة الدفع عشان نتجاوز المشكلة بتاعة الشكوى إن القراءات مش دقيقة أحيانا وفيه ظلم أحيانا أخرى.
8- حبينا نقول للناس وللإعلام ولأهالي الصعيد حجم الجهد المبذول والتكلفة المالية اللي الدولة حطتها، وده مش مَنّ، ده شغلنا واحنا بنعمله وإن معملناش يبقى مقصرين، وهنعمل أكتر من كده.
9- ساعات ناس على مواقع التواصل الاجتماعي بيشككوا في اللي موجود، خلوا الناس تشوف كل مشروع، لأن كل مشروع معمول ده سد عالي على الأقل، وأنا مش ببالغ.. أنا عايز الناس تشوف عشان معنوياتها ترتفع، وثقتها بنفسها تزيد بإن الدولة دي قادرة إنها تحسن وضعها وتبقى في مستوى أفضل من كده.
10- أي حاجة بتتعمل هنا في الصعيد أهل الصعيد أولى بالشغل فيها.
