تامر حسني يروي تفاصيل سرقة ألبومه "بنت الإيه"

كشف الفنان تامر حسني تفاصيل سرقة ألبومه “بنت الإيه” وتسريبه قبل طرحه في الأسواق، موضحا كواليس عمل هذه الأغنية.

قال “حسني” خلال لقائه مع برنامج “معكم” الذي تقدمه الإعلامية منى الشاذلي ويعرض على شاشة CBC، إن ألبوم “بنت الإيه” لم يكن بهذا الاسم، ولكن كان اسمه “مكنتش مبين”.

نرشح لك: خبيرة تاروت: أحلام هتاخد إجازة طويلة في 2022

أضاف: “وخلاص بنحضره، ولقيت فيه راجل كده الله يبارك له، تسبب إنه سرق الألبوم من عند أستاذ نصر، من على الكمبيوتر بتاعه، والراجل كان ليه الصلاحية أنه يدخل على الكمبيوتر، مكنش يقصد سرقة بس يعني كان لسه خاطب جديد، وعمال بقى يمسي على خطيبته كل شوية خدي أغنية لتامر حسني، هي تاخد الأغنية وتمسي على أصحابها في الجامعة”.

استكمل: “فجأة لقينا الألبوم كله نزل، فأنا زعلان جدا لأن الألبوم اتضرب، فإحنا لما نطبعه وينزل الناس هتشتريه ليه أصلا، بقاله أسبوع ببلاش، فكلنا كنا في حالة حزن مش طبيعي، فأنا روحت لأستاذ نصر قولتله ممكن تديني فرصة بس قبل ما تطبع، قولتله اديني فرصة ادخل اعمل أغنية جديدة كده جايز تحصل فكرة تخلي الناس تجيب الألبوم”.

واصل: “دخلت الاستوديو طلبت من مهندس الصوت أمير المحروس إني عايز اعمل أغنية دلوقتي حالا، قالي بتقول إيه الأغنية؟ قولتله مش عارف، قالي طيب أقعد على الكنبة اللي ورايا لحد ما اخلص الشغل اللي معايا، قعدت عمال أجمع أفكار، طلعت: (على قد ما شوفت وعيشت وإيه جربت أكتر من اللي نفسي فيه) مكنش لسه فيه بنت الإيه مكنتش عارف أقول إيه؟ فقومت قايل يا بنت الإيه أي كلمة احطها، واشتغلنا، دورنا على كلمة ملقيناش فخليناها بنت الإيه، وأنا معنديش أغنية فقومت قايل (لا لا لا لا) وطلعت حلوة”.

أردف: “فدخل أستاذ نصر بيزعق وبيقول أنا لازم اطبع، قولتله الأغنية اهي وعمال اكمل كلام أي حاجة وعجبته.. نزلت وفضل الألبوم أكبر مبيعات في حياتي لحد فترة قريبة”.