تامر حسني عن والدته: الوحيدة اللي كانت شايفة إني فنان

كشف الفنان تامر حسني عن دور والدته في حياته المهنية، موضحا أهمية دعمها له في تحقيق ما وصل إليه.

قال “حسني” خلال لقائه في برنامج “معكم” الذي تقدمه الإعلامية منى الشاذلي على شاشة CBC: “أمي حنينة جدا طبعا، ودايما كانت شايفة حاجة فيا”.

نرشح لك: تامر حسني يروي تفاصيل سرقة ألبومه “بنت الإيه”

تابع: “أنا طبعا لو عيشت عمري أشكرها على اللي هي عملته معايا مش هقدر اديها حقها، ده مش كلام وخلاص، لاء، يعني أنا كان نفسي أبقى لاعب كورة، هي الوحيدة بس في الحياة اللي شايفة إن ده فنان، وأنا عايز أبقى لاعب كورة”.

استكمل: “والحقيقة هي اهتمت بالموهبتين عندي بس الأقدار كانت دايما بتلعب دور معانا بيؤيد رأيها إن أنا هغني وهمثل، ودايما كانت بتزقني ناحية الغنا والتمثيل، وفيه طبعا تعنيف، فيه سلاح الأم بقى، الشبشب المجنح، محدش سلم منه ده”

أضاف مازحا: “ده أنا في البيت حارس مرمى، عليها رمية مابتجليش، تستفز أوي لما اطير وامسكه، أنا بهزر على فكرة في موضوع السلاح ده لاء كان عندها أسلحة تانية، بأمانة يعني هي كانت ممكن ترمي أي حاجة جنبها، ده أخطر، بس يعني أحيانا على مدار عمري 3 أو 4 مرات”.