سيد علي يقع في "كماشة" بين مرتضى وعكاشة
عاتب الإعلامي سيد علي، أحمد موسى، مقدم برنامج “على مسئوليتي”، بعد هجوم مرتضى منصور، رئيس نادي الزمالك، عليه لاستضافته طليقة توفيق عكاشة، مالك قناة الفراعين، حيث قال: “أحمد أنا الحقيقية زعلان منك.. مينفعش في برنامجك يتم توجيه أي إساءة ليا يا احمد”، فرد موسى: “معرفش إن المستشار مرتضى يقصدك يا سيد خالص أنا دماغي راحت في حتة تانية”.
وهنا تدخل عكاشة قائلًا: “الأستاذ سيد صديق شخصي للمستشار مرتضى منصور .. فهو بدل ما يعاتبك انت يعاتب مرتضى منصور”، ثم أكمل سيد علي مداخلته قائلًا: “الأول عايز أبارك لدكتور توفيق.. الحاجة التانية يا احمد انت تذكر في المشكلة بتاعتك أول ما حصلت انا طلعت بدون ما استأذنك وقلت انا بعتذر للدكتور أسامة الغزالي حرب لأن وقتها كنت خايف عليك وقلت أنا مش متخيل للحظة أحمد موسى يكون موجود في السجن”.
وأضاف علي: “انا جبت مطلقة الاستاذ توفيق عكاشة والحلقة موجودة لا يوجد هناك أي تعريض او خطأ او إساءة للدكتور توفيق وفضلت مُصر طول الوقت على ان يحصل مصالحة”، ووجه حديث لمنصور قائلًا: “انا مبعرفش اللبس في الخصومة وفي بيني وبينك عيش وملح ودخلت بيتك.. مينفعش يتقال من صديق مهما كان في بينا خصومة “اللي مطرود من القنوات”.. وانا يشرفني اني وقفت جنبه في مواقف كثيرة جدا”.
كما تدخل عكاشة في الحديث مرة أخرى قائلًا: “المستشار مرتضى منصور لم يُخطئ.. انا شفت الحلقة وهذه الحلقة كانت ناقصة ومكنتش معلوماتها كاملة.. وكل ما ذكرته في هذه الحلقة كان خطأ والأستاذ خالد سليمان رد عليه بالمستندات”، وأضاف عكاشة مخاطبًا سيد علي: “سبب زعل المستشار مرتضى الأساسي.. انك عندما تعرضت لمشكلة في مهد الثورة 25 “خساير” -قاصدًا يناير- وجبت نجاة عبد الرحمن.. من الذي وقف مع سيد علي؟ قناة الفراعين.. فعز على المستشار مرتضى إن سيد علي يقول صُلح على الهواء.. طب ما يتعمل الصلح خلف الأبواب المغلقة”.
وبرر سيد علي استضافته لطليقة عكاشة قائلًا: “اسألوا السيدة رضا الكرداوي كام قناة في مصر كانت رايحالهم؟.. وقالت الراجل اللي بثق فيه وهطلع معاه هو ده لانه مش عايز شو إعلامي”، وهو ما نفاه عكاشة مؤكدًا أنها “لفت على القنوات”.
بينما قال مرتضى منصور، في مداخلته الهاتفية ردًا على قوله في حق سيد علي بانه “مطرود من القنوات”: “انا كلمت حسن راتب وحاولت ارجعه .. لكن هو اداله 250 ألف جنيه وقالوا امشي.. ثانيًا هو بيكتب كلام في جريدة الخميس كلام ميصحش وآخرهم لما الزمالك خد الدوري.. والناس مش طايقة اللي بيكتبه مفيش هزار مع جماهير 45 مليون”.
أما بخصوص استضافة علي لطليقة عكاشة، فقال منصور: “لفت على جميع القنوات.. حتى الإبراشي عشان تعمل مداخلة.. وكلها رفضت.. لكن هو سعى انه يطلعها وده عيب.. ده لما حد بيتخانق مع كمسري بيوقفوا الاوتوبيسات ويقولوا ده زميلنا.. ما بالك بالإعلام.. وبعد ما طلباتها كانت 50 ألف طلبت مليون وشقة.. لا انت عملت كارثة مع زميلك”.
أما سيد علي فرد على اتهامات منصور قائلًا: “والمستشار مرتضى مش فاكرلي موقف مهني عملته معاه؟ مش فاكر ولا حاجة خالص من أيام ما كانوا بيحاربوه من سنة 82؟”، فقال منصور: “لا بصراحة مش فاكر خالص”.
وتابع منصور قائلًا عن طليقة عكاشة: “انا كلمتها بعد كدة وقلتلها يا بنتي لمي نفسك مش هتاخدي ولا مليم في الآخر”، كما استمر في توجيه اللوم لسيد علي قائلًا: “لو عايز مصالحة تكلمها في التليفون مش تجيبها على الهواء وتقول عن عكاشة ده بيجيب أكل للكلاب بخمس آلاف جنيه مع انه كان ميسور والقناة خربت بيته”، وقد وافق عكاشة على جميع ما جاء في حديث منصور، قائلًا: “كل اللي قاله المستشار مرتضى حصل”، بينما رد سيد علي قائلًا: “والله العظيم لو الكلمة دي اتقالت يبقى أنا مُخطئ ومخدتش بالي في زحمة الحلقة”.
كما اعترف منصور خلال مداخلته بأنه تدخل لقطع الحلقة قائلًا: “الحلقة من البداية للنهاية تشويه للدكتور عكاشة زميلك.. ودي واحدة معندهاش قضية بدليل انها طالبت بأنه يعتذر لريهام سعيد.. دي واحدة بتهزر”، وتابع: “السر اللي متعرفوش بقى يا أستاذ سيد إن أنا اللي قطعت عليك الهواء.. أنا كلمت المسئولين في القناة وقلت ميصحش اللي بيحصل وقطعوا عليك الهواء”، وهو ما نفاه سيد علي قائلًا: “مش صحيح تمامًا وممكن تكلموا المسئولين في القناة”.