13 تصريحا لـ الرئيس "السيسي".. أبرزها عن جائحة كورونا وتداعياتها
شهد الرئيس عبد الفتاح السيسي، قبل قليل، الجلسة العامة الرئيسية حول جائحة كورونا والتي عقدت خلال النسخة الرابعة لمنتدى شباب العالم بعنوان “إنذار الإنسانية وأمل جديد”.
وخلال الجلسة أدلى الرئيس “السيسي” بالعديد من التصريحات حول جائحة كورونا وتداعياتها، وجاءت أبرز تصريحات الرئيس “السيسي” كالآتي:
1- كورونا تحدي عظيم قابل الإنسانية في العصر الحديث، وشكلت تحديات مركبة سياسية واقتصادية واجتماعية كبيرة جدا خلال فترة السنتين اللي مروا.. احنا دايما نقول في كل محنة تولد منحة.
2- التداعيات اللي أفرزتها الجائحة حتى الآن أدت إلى توقف قطاعات كاملة خلال السنتين اللي فاتوا في كتير من الدول، وفيه دول عملت إغلاق كامل لكل مناحي الحياة،.. كنا متصورين إن حجم الضرر عدة آلاف، لكن الخسائر سواء كانت من إصابات أو اللي في فقدانهم في العالم كله، فوجئنا إنها بتتجاوز الملايين.
3- احنا كنا من الدول اللي خدت استراتيجية خاصة بالإغلاق المؤقت مع الاحتفاظ بالإجراءات الاحترازية اللي تكفينا شر هذا المرض بقدر الامكان، والنتائج في الإصابات أو حالات الوفاة، اللي تحققت قياسا بالدول اللي مثيلة لنا بالعدد، كانت إيجابية جدا.
4- الإجراءات اللي عملناها كمبادرات صحية أفرزت عن إننا قدرنا نشوف الخريطة الصحية للمصريين، وأيضا نتخلص من أمراض كان موجودة معانا في مصر وأكيد كان هيبقى ليها تأثير سلبي جدا أثناء تصدينا لهذه الجائحة.
5- خلال 2018، و2019.. خرجنا من المسح والمبادرات بقدرة صحية لا بأس بها، دي اللي احنا اتعاملنا بيها مع الكوفيد.
6- قدرنا بعد ما كنا من الدول الأكثر إصابة بفيروس سي، بقينا بنقدر نتكلم عن نفسنا دلوقتي وبشهادة منظمة الصحة العالمية إننا من الدول الأقل إصابة بالفيروس.
7- في مصر مخفناش من الكوفيد، ولو كنتوا شوفتوا الشعب المصري كان بيتعامل معاها إزاي!.. آه فيه إجراءات احترازية وفيه تحسب، واندفاع للتطعيم، لكن لم يتوقف العمل في مصر لحظة، لأن احنا مهما كانت المحنة، لا تجعلنا أبدا نتوقف والحياة تقف.. لا الحياة متقفش، الحياة هتستمر، وهنتجاوز آثارها بشكل كامل قريبا.
8- الكل اتفق على إنه رغم إن محنة كوفيد كانت قاسية على العالم، إلا أنها ألقت الضوء على أهمية إننا نزود من تواصلنا واستعدادنا لإتاحة فرصة أكبر لشباب العالم، إنه يكون ليه مشاركة أكثر فاعلية من الواقع الحالي.
9- مرضتش أتكلم عن اللقاحات كموضوع وإنه كان ليه آثار في العالم كله، إن بعض الدول كان لديها الفرصة ودول أخرى لم يكن لديها الفرصة لتوفير لقاحات لشعوبها في ظل هذه الأزمة.. لكن ده ألقى الضوء على أهمية التشارك العالمي، في مجابهة التحديات بشكل عادل، مش مرتبط بالقدرات الاقتصادية أو التكنولوجية والعلمية.
10- في بداية الجائحة قلت إن عالم ما بعد كورونا هيكون عالم مختلف عما كان، واحنا فعلا رايحين لكده.. لكن عايز أقول للشباب إن احنا مش هنعرف كل حاجة أفرزتها الجائحة دلوقتي، يمكن كمان سنوات تزيد أو تقل، هنشوف النتائج اللي عملتها الجائحة في العالم كله، وهتجدوا إن هي ليها آثار إيجابية جدا، رغم المحنة اللي عانينا منها خلال الأزمة.
11- بدأنا في نوفمبر 2016 برنامج الإصلاح الاقتصادي وأتصور إن احنا لو مكناش أطلقنا هذا البرنامج، اللي كان فيه قسوة شديدة علينا كمصريين، كان هيبقى تداعيات الموقف الاقتصادي في مصر أكتر بكتير مما لو مكناش عملنا هذا البرنامج.
12- البرنامج الاقتصادي خلى الاقتصاد المصري قادر إنه يتحمل صدمات أكبر من اللي هيسببها هذا الوباء على العالم كله ومصر أكيد
13- أنا دايما ببص على موضوع الفيروس ده وكأنه يرسل لنا رسالة وبيقول: “أيها البشر انتبهوا.. أنتم لستم قادرين على تحدينا”.