منى الشاذلي عن مظهرها العام: "الشكل مش من أولوياتي"
قالت الإعلامية منى الشاذلي، إنها رفضت ظهور نجوم كبار في أوقات معينة من حياتهم، لعدم رغبتها في استغلال أزماتهم ومخالفة ضميرها المهني.
تابعت “الشاذلي” خلال لقائها مع البرنامج الإذاعي “الراديو بيضحك” مع الإعلامية فاطمة مصطفى، المذاع على راديو “9090”: “أي امرأة عاملة هتبقى عارفة كويس إن أي ست عندها أسرة وأطفال وشغل في جزء كبير منه منافسة وملوش مواعيد، لذلك أنا بتعاطف مع أي امرأة ناجحة في شغلها وبيتها، ومش تعاطف أنثوي لا ده تعاطف موضوعي، لكن بطمن كل فتاة وست إن اللي شايفني بيه ده نتيجة مجهود كبير جدا وإن الرونق اللي على الشاشة ده جزء من الشغلانة أصلا”.
نرشح لك: منى الشاذلي: رفضت ظهور ميجا ستارز في برنامجي بسبب ضميري
أضافت: “لازم نبقى طالعين بشكل لائق فكريا ولغويا وشكليا، إنما أكيد أنا في الأجازات مش زي في التليفزيون نهائي.. بيبقى الشعر ملموم والدنيا عملية جدا زي أي ست في البيت، وأصعب حاجة إنك تحافظ على أسرتك ونجاحك”.
أردفت: “أنا اتربيت كده، أنا ابنة الطبقة المتوسطة اللي جزء كبير جدا من تكوينها الاحترام شكلا ومضمونا وأداء، مليش فضل في ده، ده بيعبر عن نشأتي والطبقة الاجتماعية اللي أنا جاية منها وعن مفهومي للحياة”.
استطردت: “لكن أنا لا موديل ولا ممثلة ولا نجمة ومش مطلوب مني في أي محفل إني أنافس بالشكل والمظهر والقوام دي مش منطقتي، منطقتي إن لما أقعد مع المشاهد أحترمه، بشوف النجومية في ده، الشكل مش من أولوياتي بالعكس بحس إن الناس بتنتقد شوية إن مظهري كلاسيكي ومفيهوش حاجة مبهرة وأنا مش زعلانة من ده لأن بالنسبة لي الإبهار يمكن في مناطق أخرى”.
في سياق متصل، قالت الإعلامية منى الشاذلي، إنها رفضت ظهور نجوم كبار في أوقات معينة من حياتهم، لعدم رغبتها في استغلال أزماتهم ومخالفة ضميرها المهني.
تابعت “الشاذلي” خلال لقائها مع البرنامج الإذاعي “الراديو بيضحك” مع الإعلامية فاطمة مصطفى، المذاع على راديو “9090”: “في قرارات مهنية صعبة الإنسان القوي هو اللي بيقدر ياخدها، وأحيانا بيبقى النجاح قدام وجايلك على حجرك وتقول لأ مش عاوزه، أوقات بيبقى في شخصية كبيرة وميجا ستار بمثابة صيد ثمين هيجيب فرجة وناس في الوقت ده تحديدا، وهو اللي يطلب يطلع معايا بس أنا أحس إن الشخص ده مش متزن نفسيا في الفترة دي.. فبرفض”.
أضافت: “لأن لو عملنا الحوار في الفترة دي.. هيتأذي طول العمر، أنا قلت لا لميجا ستارز لا يقاوموا، لأنها تبقى جريمة لو وافقت.. وياما نجوم زعلوا مني بس بعد سنين قالوا لي ليكي جِميلة في رقبتنا إن مخلتيناش نطلع وإحنا في الوضع ده”.