إدوارد عن أول ليلة في إصابته بكورونا: فكرت في الموت
تحدث الفنان إدوارد، عن إصابته بفيروس كورونا، وأول ليلة قضاها مع المرض. مشيرا إلى أنه فكر في الموت، وعلم مدى حب زوجته له.
كتب عبر حسابه بموقع التواصل الاجتماعي “فيس بوك“: “هحكيلكو على أول ليلة مع الكورونا بما أنها أول مرة تجيلي وطلعت منها بإيه.. ليلة صعبة جدا تعب في الجسم زي ما يكون حد بعذبك وبدوس على كل حتة في جسمك وصداع نفسك يغمى عليك عشان تخلص منه ورعشة فظيعة وطول الليل بقول يا رب”.
نرشح لك: للمرة الثانية.. إصابة رشوان توفيق بفيروس كورونا
تابع: “مش هنكر في لحظة فكرت في الموت والناس اللي ماتت من الكورونا صدقوني ماخوفتش من الموت، خوفت على مراتي وولادي وعيلتي وأنهم مسؤولين مني ولازم أبقى موجود عشانهم ولازم أصلي لربنا عشان يقومني أكمل، وحسيت إني فقدت شغف كل متع الحياة مش عاوز حاجة.. عاوز أكون كويس عشانهم بس أنا من النوع اللي بحب الناس وبحب الحياة وبحب الأصحاب، انبسط كتير اوي لما لقيت ناس كتير سألوا عليا أعرفهم وماعرفهمش وعاوزين يساعدوني في محنتي بأي شكل ومنهم فنانين كبار بجد وإعلاميين كبار، بجد ربنا يباركلكم في صحتكم وعيليتكم كمان”.
أضاف: “اكتشقت قد إيه مراتي أنا غالي عندها مش هممها كورونا ولا مش كورونا.. قاعدة جنبي تعملي كل حاجة تريحيني قد إيه أنتي ست عظيمة جالك كورونا ومقولتليش السنة اللي فاتت عشان كنت بشتغل ومش عاوزة تشغليني بيكي مكنتش عارف أنها صعبة للدرجه دي، بجد انتي جبل أنك استحملتي وكنتي واقفة كمان تخدمينا وتشوفي طلبتنا.. أنا آسف إني محستش بيكي في الوقت ده.. أوعدك أقوم وأعوضك عن كل ده”.
اختتم: “الحياة مش مستاهلة غير أنك تعيش مع ناس بتحبها وتحبك وتخاف عليك.. دي الخلاصة إني فقدت الشغف في متع الحياة عاوز أعيش مستور أنا وعيلتي ويكون حواليه ناس بحبها وبتحبني ونتمنى لبعض الخير وبس في ليلة واحدة.. الدنيا علمتني كتير ربنا يبعد عنكم أي حاجة وحشة”.