أحمد عبد الغني يكتب: عنتر ولبلب الكرة المصرية!!
الحال عندنا فى الرياضة المصرية حاليا بيفكرنى بالفيلم دا والرهان اللى كان بين الأتنين على أن لبلب يضرب عنتر سبع أقلام .. ونجح لبلب الغلبان الضعيف بمساعدة أهل الحارة الشرفاء فى ضرب عنتر القوى الغنى اللى أستعان بالبلطجية والحرامية والفلوس علشان تحميه وبرضه مقدرش ؟؟
الأهلى والزمالك .. أو بالأصح محمود طاهر ومرتضى منصور .. متقدرش تقول مين فيهم عنتر ومين فيهم لبلب .. المهم أنهم داخلين حرب تكسير عظام فى بعض وخلاص .. عند وتكبر وزعل وقمص وخلاص ..!!
المشكلة أن الموضوع بتاع الأهلى والزمالك ومين يضرب التانى قلم ومين يكسب التانى جولة كان موجود من زمان بس زاد قوى الإيام دى .. وخد منحنى تانى خطير دخل فى تأليب الجماهير وزيادة الإحتقان بين جماهير الناديين .. والدنيا مش ناقصة مشاكل والبلد والعة وعلى المحك أساسا ..!!
فى التسعينات خطف الأهلى رضا عبد العال نجم الزمالك وقتها .. رد الزمالك بأنه خد إيمن شوقى ومحمد عبد الجليل .. رجع الأهلى رخم على الزمالك فى صفقة سعيد عبد العزيز لاعب المحلة .. وأتوقف مدة طويلة لآنه كان ماضى على عقود للزمالك والأهلى .. واستمر الأهلى فى فرض سيطرته وسطوته على اللاعبين وكان بياخد إى لاعيب كويس حتى لو مش محتاجة المهم أنه ميروحش الزمالك .. زى أحمد حسن دروجبا مثلا .. وعبد الحميد شبانة .. وغيرهم ..
لكن من العام الماضى ابتدى الزمالك يرد أقلام الأهلى السابقة واستحوذ على ثلاثى الشرطة وأيمن حفنى .. واتسبب فى إيقاف باسم على .. لكن الأهلى ماسكتش .. ضرب قلم مؤمن زكريا وبعدين إيفونا وجون أنطوى وفى الطريق عمرو السولية .. لكن الزمالك ضرب أقلام فى ألعاب أخرى مثل اليد والطائرة .. ولحد دلوقتى معرفناش عدد الأقلام اللى ضربوها لبعض قد إيه ..؟؟
كل اللى فات حمادة وحكاية أحمد الشيخ حمادة تانى خالص .. الموضوع تعدى الرياضة ودخل فى التراشق بالألفاظ والقضايا والسب العلنى .. وخدش الحياء .. وكل دا على شاشات الفضائيات .. والدولة واقفة تتفرج ومحدش من الحكومة بيتدخل لأنهم مش فاضيين بصراحة .. يعنى الحكومة هتحل مشكلة مرتضى ومحمود طاهر ولا مشكلة البطالة ولا النظافة ولا التعليم ولا الفساد .. وكتر خير وزير الرياضة اللى حاول يصلح بينهم .. لكن فى النهاية هما مايستهلوشى .. لأن المشكلة عندنا فى الأخلاق .. واللوائح والقوانين اللى بتطبق بالمزاج وبتتفصل على ناس وناس .. حتى أسالوا الأمناء ..
ويبقى السؤال مين فيهم عنتر ومين لبلب .. ومين اللى هيضرب القلم اللى جاى ..؟؟