هشام ماجد يرد على أنباء انفصاله فنيا عن شيكو
رد الفنان هشام ماجد على أنباء انفصاله فنيا عن الفنان شيكو، بسبب تقديم الأول فيلم “حامل اللقب” لأول مرة بدون مشاركة شيكو.
أوضح ماجد للإعلامية لميس الحديدي خلال برنامج “كلمة أخيرة” على قناة ON، أنه لم ينفصل فنيا عن شيكو كما يردد البعض مؤخرا، وفسر تقديمه فيلما بدون مشاركة شيكو بأن هناك أعمال لا تصلح للبطولة الثنائية.
نرشح لك: هشام ماجد: خسيت 7 كيلو عشان فيلم “حامل اللقب”
أردف: “أنا وشيكو لسه مع بعض.. اللي بيجيله حاجة حلوة بيعملها، أصل في أفكار متنفعش لاتنين.. فاحنا بنعمل مع بعض مسلسل اللعبة دلوقتي وهو عنده فيلم وأنا عندي فيلم وعندنا فيلم مع بعض، ففكرة الانفصال دي مش معناها إن احنا اتخانقنا وسيبنا بعض بالعكس، وحتى مع أحمد فهمي احنا متكلمين إننا نعمل فيلم سوا تاني.. بس لازم نلاقي فكرة تناسبنا ونقدر نعمل حاجة حلوة زي اللي كنا بنعملها زمان؛ مش فكرة أن احنا نرجع بس”.
تابع أن فكرة اشتراك أصدقاء في عمل فني جيدة لأن الكيميا بينهم تظهر للجمهور، مضيفا: “لازم حتى أي فرقة موسيقية تنفصل بعد شوية دي سنة الحياة، هييجي وقت احنا عندنا 60 سنة مش معقول هنبقى بردو فرقة، بس انا وفهمي وشيكو كان بيننا كيميا رهيبة في التمثيل وكنا بنفهم بعض من أبسط حاجة، بس بييجي وقت لازم تعمل فيلم لوحدك، وأنا عن نفسي عايز أعمل فيلم لوحدي وفيلم مع فهمي وفيلم مع شيكو ومع ناس تانية، عايز أعمل كل حاجة”.
يذكر أن هشام ماجد يشارك في فيلم “ماما حامل” تأليف لؤي السيد وإخراج محمود كريم، ومن بطولة ليلى علوي وبيومي فؤاد وحمدي الميرغني ومحمد سلام، ومحمد ثروت، ونانسي صلاح، وهدى الأتربي، وسامي مغاوري.
