الدسوقي رشدي عن "مرتضى وموسى وعلي وعكاشة": طلعت ريحتكم
وصف الإعلامي محمد الدسوقي رشدي استضافة أحمد موسى لتوفيق عكاشة في برنامجه “على مسئوليتي” على صدى البلد، وظهور مرتضى منصور وسيد علي من خلال مداخلات هاتفية في نفس الحلقة بـ “المولد” وأنهم “شلة تضييع وقت البلد”.
وأضاف “رشدي” خلال حلقة أمس الثلاثاء من برنامج “الصحافة اليوم” على قناة النهار اليوم، قائلاً: “بعمل بحث عن اللي اتنشر عن الأزمة الشخصية دي لقيت بتاع 170 خبر وتحليل ومقال عن خناقات شلة تضييع وقت البلد، وده أكثر مسمى محترم ومناسب للحالة دي”.
وتابع: “انتوا سمعتوا قبل كده عن شلة الطاولة وشلة القهوة وشلة الدومينو، لكن الشِلل دي مش بتضر حد، إنما شلة تضييع الوقت بتحاول تشغل البلد بخناقة واحد مع طليقته، أو خناقة واحد مع جماهيره أو خناقة واحد مع النشطاء اللي بينه وبنهم تار، أنا مش عايز خناقة، بس والله عيب عليكوا، انتوا كل هدفكم يتلخص في تدمير شوية شباب، عيب لما الناس بتتلم عشان يزقوا البلد لقدام وانتوا تتلموا عشان تضيعوا وقت البلد”.
واستطرد “رشدي”: “واحد كل يوم بيقول انه بيحب البلد وبيدعم رئيسها لكن بيسيب القضايا الرئيسية ويعمل خناقة مع نشطاء فيسبوك وتويتر.. أحمد موسى بيعمل كده، تبقى مع قانون التظاهر اللي بيطبق ضد الشباب وتسكت لما القانون مايطبقش على أمناء الشرطة.. سيد علي عمل كده، عشان تعمل نفسك بطل تقول انك كنت عضو في مجلس قيادة ثورة 30 يونيو، ودي حاجة هلامية وماحدش سمع عنها قبل كده … توفيق عكاشة بيعمل كده، انك كل ما الأمور تهدى تطلع في التلفزيون تشتم فلان بأمه وتقول ألفاظ خادشة للحياء عشان تثبت انك قوي… المستشار مرتضى بيعمل كده كل يوم”.
واختتم الدسوقي حديثه قائلاً: “اللي بيحب البلد دي مايرقصش على الحبال… كفاية بقى عشان باللبناني كده طلعت ريحتكم”.