حمو بيكا لـ المتنمرين على مرضه: "من عاب شيئًا ابتلى به"

محمد هيثم

رد أدمن صفحة مطرب المهرجانات حمو بيكا على تنمر البعض على الأخير، بعد انتشار صورته وهو في إحدى المستشفيات، موضحًا أنه يعاني من مرض يسمى “الكرونز”.

كتب الأدمن عبر الصفحة الرسمية لـ “بيكا”، عبر موقع “فيس بوك”: “بتتنمروا على المرض؟ يعني اتنمرتوا عليا قولت ماشي، اتنمرتوا على صوتي قولت ماشي، اتنمرتوا على شقتي وفرحي قولت ماشي، لكن يوصل بيكوا الموضوع أنكوا تتنمورا علي المرض”.

نرشح لك: تعليق بشرى على أزمة حمو بيكا الصحية

أضاف: “ده ابتلاء من عند ربنا سبحانه وتعالى وأنا راضي بيه الحمد لله، بقول لكل حد اتنمر عليا ربنا يحفظك من مرض (الكرونز) اللي عندي ده ويحفظك من أي مرض تاني، و شكرا لكل اللي سأل عليا، أنا بقيت أحسن الحمد لله”.

أردف: “بس ياريت نفتكر دايما (من عاب بشئ ابتلي به)، وأن مهما حاولتوا تأذوني ما فيش حاجة هتحصلي غير اللي ربنا كاتبها ليا، أنا راضي و مؤمن الحمد لله وعارف أن ربنا عز وجل مش هيدخلني في حاجه غير وأنا قدها وده الدليل القرآني (لا يكلف الله نفساً إلا وسعها)، فشكراً ليكم و لكل واحد مش بيحبني فلتقل خيرا او لتصمت”.

يشار إلى أن حمو بيكا، كان قد صرح في وقت سابق، بأن حياته تدمرت بسبب نقابة المهن الموسيقية، مشيرا إلى أن النقابة ظلمته خمس سنوات، فهو غير قادر على ممارسة عمله بسبب وقف النقابة له.

أوضح “بيكا” خلال بث مباشر عبر حسابه الرسمي على موقع التواصل الاجتماعي “فيس بوك”، أنه عمل في كثير من المهن موضحًا: “اشتغلت على توك توك، واشتغلت نجار، سافرت واتغربت وشقيت وتعبت، بس عمري ما مديت أيدي على حاجة مش بتاعتي، أكل عيشي واقف وحياتي مدمرة من النقابة، ظلمتني خمس سنين، قالوا على ناس مزورين ورق وضاربين ورق، وقالوا على ناس مسجلين، والناس دي خدت الكارنيه واشتغلت، يبقى الوقف مش حكم بعدل ربنا.. وربنا لما بيدي الرزق للبشر محدش يعرف يوقفه، فرقتي أنا مقصرتش مع أي حد في شيء، الناس دي وقفت معاها ووقفت جمبها وهما بيطلعوا يقولوا بيكا بينسب النجاح لنفسه، وأنا عمري ما نسبت نجاح لنفسي.. أنا مبعرفش اقرأ ولا أكتب ولا أعرف أرد على الناس، الناس حبت حمو بيكا عشان حمو قلبه أبيض”.