عمرو أديب: هقعد في البيت لو باخد 3 مليون دولار
رد الإعلامي عمرو أديب، على تصريحات مرتضى منصور، رئيس نادي الزمالك، حول تلقيه أجر على برنامجه يصل 3 مليون دولار.
قال “أديب” خلال برنامجه “الحكاية“، أمس الجمعة عبر شاشة “mbc مصر”: “مرتضى منصور طلع الأسبوع اللي فات قال للناس عمرو أديب بياخد في الشهر 3 مليون دولار.. كده هيبقى ليا الفخر يا سادة إني باخد في الشهر أكتر من كريستيانو رونالدو وميسي ومن العقد الجديد بتاع صلاح، أنا مضايقنيش مرتضى منصور لأنه مش طايقني.. الغريب إن فيه ناس صدقت، أنا مستعد أخد ال3 مليون دول في شهرين وأقعد في البيت والله وما تشوفنيش في البرنامج تاني”.
نرشح لك: بعد غياب 6 سنوات.. شيرين تحقق حلم أحد المعجبين وتعود للأفراح
أضاف: “ده محمد صلاح لما مرتبه يزيد هياخد في الشهر 2 ونص مليون، يبقى أنا أخد أكتر؟ على أساس بجيب أجوان أكتر من محمد صلاح”.
كان الإعلامي عمرو أديب رد مؤخرا على الانتقادات التي وجهت له، بسبب تصريحاته بشأن ارتفاع الأسعار، وضرورة التخلي عن شراء السلع مرتفعة الثمن لمواجهة الأزمة.
كتب أديب عبر حسابه على تويتر: “فى نفس الحلقة اتكلمت عن ازاي الناس تشتري الأرخص وتختار المحلات اللي بتبيع الأساسيات الثابتة من غير زيادة، واتكلمت عن دور الدولة في ضرب الاحتكارات.. وما كان موضوع البيض الأورجانيك إلا انتقاد للناس اللي محبكاها قوي وتشتكي من أشياء تافهة”.
تابع: “ثواني والجزيرة مصر سابت ساعة كلام واشتغلت عالبيض والبسطرمة اجتزاء وترصد كالعادة اتعودت عليه. المهم الفيديوهات موجودة وياريت الناس تبطل ثقافة الهاشتاج.. وفي النهاية الرسالة واحدة الأيام اللي جاية صعبة”.
أضاف أديب: ”واتكلمت عن إزازة الزيت بكام وعلبة اللبن حالها ايه والجبنة المثلثات نعمل معاها إيه والسمنة نتصرف معاها ازاي.. إنما ثقافة التفاهة والترصد المستمر وطبعا أنا خبير وقديم ومش مصدق إني بكتب بحكي والفيديوهات موجودة ولكن هذا عملي وهذا وطني وهذا قدري”.
