نجوى فؤاد عن الفنانين: مابشوفهمش غير لو حد رايح يتدفن
قالت الفنانة نجوى فؤاد، إنها ترى أن الوسط الفني حاليا لا يهتم بالسؤال والاطمئنان على بعضهم البعض كما كان الحال في جيلها.
تابعت “فؤاد” خلال لقائها مع برنامج “كلام الناس” المذاع على شاشة mbc مصر وتقدمه الإعلامية ياسمين عز: “إحنا جيلنا كان فيه تلاحم أكبر من كده، تلاقي الفنانين بتسأل عن بعضها ولو واحد كان غاب شهر ومظهرش في الوسط والمجتمع بتاعنا كانوا يسألوا عليه، كان يوم الخميس ده كل فنان لازم يعمل ليلة عشان نلتقي مع بعض وكذلك في كل المناسبات”.
نرشح لك: نجوى فؤاد عن “بدل الرقص”: أنا أول واحدة استخدمت “الشيفون” لتغطية البطن
أضافت: “أنا دلوقتي مش شايفة غير المجتمع العادي والجمهور والشعب اللي نجمني بيسأل عليا، وجيراني بيخبطوا عليا كل شوية ولو مافتحتش تبقى كارثة ممكن يكسروا الباب.. إنما الزمن ده مش عارفة ماله، بنغيب على بعض كتير أوي ومابشوفهمش غير لما حد بيرحل ورايح يتدفن لابسين الأسود في العزا وبيتصوروا وبيقولوا كلمتين عن اللي راح.. طب ليه مكلمتهوش وهو حي، مزورتهوش ليه وهو حي؟ مسألتوش عليه وشوفتوه تعبان من إيه وطلبته من الدولة إنها تساعده، طيب ليه معملتوش ده؟ فدي اللي كانت مضايقاني في الحياة”.
في سياق منفصل، أوضحت رأيها في زي الراقصات الأجانب، قائلة: “رأيي في الأوكرانيات والروسيات، هما بيرقصوا حلو، اللي بيتمرنوا عليه بيرقصوا حلو، لكن الزي بتاعهم أنا غاضبة وربنا غاضب، لأن لازم يبقى فيه عليهم رقابة، كتير أوي يعني فاضح، اللبس مفتوح كتير مش شويتين، كتير كله مفتح، كله شبابيك”.
استكملت: “فلازم يتوجهوا يلبسوا ازاي لأن أنتوا في بلد لها تقاليدها وبلد إسلام أكتر ما هي مثلا أوروبية أو أجانب فيها، يعني لازم يتوجهوا ما هما مش عارفين حاجة، هما عندهم ده عادي، إحنا عندنا مش عادي”.