حمدي هيكل: أدوار الشر أثرت عليا نفسيا
قال الفنان القدير حمدي هيكل، إنه تأثر نفسيا من حصر المخرجين له في أدوار الشر.
تابع “هيكل” خلال مداخلة فيديو مع برنامج “مساء dmc” مع الإعلامية إنچي القاضي، أمس السبت عبر شاشة “dmc”: “من كتر ما عملت أدوار شر زهقت منها خلاص بقت بالنسبة لي حاجات عادية يعني، نفسيا بقى لما بخوض تجربة وبيبقى فيها كمية شر بتأثر عليا نفسيا، في أي عمل أنا بشتغل فيه بتعامل مع الكلام اللي على الورق وأحوله لدم ولحم وشخصية.. وعشان أعمل ده المفروض بمر بمراحل نفسية للشخصية دي”.
نرشح لك: نجوى فؤاد: ندمانة على رفضي الإنجاب
أضاف: “مثلا شخصية أبو لؤلؤ في مسلسل (لؤلؤ)، دي كانت شخصية صعبة أوي وشرير بدرجة خطيرة، وكل مشهد كنت بحس قد إيه الشخصية دي بشعة.. وعشان أخرج منها كل ده خد وقت”.
أردف: “أدوار الشر الكوميدية مكانتش بتضايقني أبدا، بالعكس كنت ببقى عارف إن دي شخصية كوميدية في فيلم كوميدي.. لكن الغالبية العظمى في شغلي كلها أدوار شر، الفنان لما يبقى عنده دراسة بيقدر يعمل أي شخصية بتتعرض عليه ويطوع جهازه العصبي عشان يعمل الشخصية دي”.
مسلسل “لؤلؤ” بطولة مي عمر وأحمد زاهر وإدوارد ومحمد الشرنوبي وهدير عبد الناصر وسلوى عثمان وهيدي كرم ونجلاء بدر، قصة مي عمر وسيناريو وحوار محمد مهران، إخراج محمد عبد السلام.