أبرز تصريحات الرئيس السيسي خلال احتفالية تكريم المرأة المصرية
شهد الرئيس عبد الفتاح السيسي وحرمه السيدة انتصار السيسي، صباح اليوم الأربعاء، احتفالية تكريم المرأة المصرية والأم المثالية 2022.
ألقى السيسي خلال الاحتفالية كلمة تضمنت تعليقه على العديد من الموضوعات، وجاءت أبرز تصريحاته كالتالي:
1- بنقول كل الأمهات متشكرين ومقدرين تعبكم، كل ست في بيتها بتقوم بجهد كبير أوي لا ينكره إلا جاحد أو ظالم.. والأمهات الفضليات اللي عند ربنا ندعو إنه يتغمدهم برحمته بحق كل حاجة حلوة عملوها وكل سهرة سهروها وكل هدمة غسلوها وكل أكلة عملوها بحق كل دعوة دعوها.. يارب هم ضيوف عندك وأكرمونا كلنا وبقوا في دار الحق فتفضل عليهم بكرمك وعفوك ولطفك.
2- لما قلت إن المرأة سبب أصيل لحالة النجاح اللي بنعيشها مكنتش ببالغ، اللي حصل في العشر سنين اللي فاتت كانت هي محركة ليه وصانعة للأحداث.. وفي الإصلاح الاقتصادي قلنا محتاجين دعم المرأة وحصل فعلا وبنشكرها على ده، وإنه بسبب دعمها قدرنا نمرر ظروف قاسية تجاوزناها بدعمها ومساندتها.. الراجل موجود آه وبيقوم بدوره وكل حاجة.. لكن المرأة هي المحرك الأساسي، حتى في البيوت والحياة العامة للأسر الست هي اللي بتشيل في أغلب البيوت.
3- اللي عايز يشكرني وقد يرى إني عملت شيء طيب يخلي باله من مصر.. الله يعلم ما في نفسي ويعلم إننا عايزين نحافظ على الوطن ده وعلى حياة الـ 100 مليون مصري.. أتمنى إن نساعد كلنا إن محدش فيهم يؤذى في ظل الحالة الموجودة في العالم.. اللي يعمل ده يبقى مش قمة الشكر ليا بس ولكن الشكر لله سبحانه وتعالى.
4- المسؤولين ممكن ياخدوا قرارات كتير لكن يبقى إن توفيق ربنا ودعمه للقرار ده الأساس.. إحنا محتاجين الناس تساعد معانا، إحنا معندناش مشكلة لا في سلع أساسية ولا في أي شيء، حاجتنا زي ما إحنا عايزين وزيادة، وده فضل ربنا وجهد الدولة وجهدكم.. ولو عاوزين تنزلوا تعبوا من الأسواق إحنا معندناش مشكلة والله.. مش بقولك متشتريش براحتك.. لو عاوزين مستقبل أفضل لازم نراجع طريقنا ومصاريفنا.
5- أنا في بيتي راجل عادي زي أي أب وزوج.. أنا والله ما رئيس.. بيتقال أكيد السفرة بتاعته كرئيس دي مختلفة، أكيد بياكل من الجنة.. بالعكس أنا بقول لهم نوفر وجبتوا دي بكام ونوفر في دي ونجيب دي.. مش مهم الوفرة اللي في جيبي المهم الإنفاق المناسب، لأن البلاد مبتتعملش بالأمال والأحلام والكلام، البلاد بتطلع لقدام بالجهد والمثابرة والوعي.
6- الدراما لما اشتغلت على إن الدولة خصم الناس اتحركت تهد الدولة، الدولة مش خصم إنما كل إنسان مسيء هو اللي خصم.. يعني أنا تابعت حادثتين مؤخرا لانتحار بنتين عشان حد فبرك صور والكلام ده، لا بد المجتمع ينتبه لولاده وبناته ويخلي باله إن أرواح الأبرياء دي في رقبتنا.. يجب على الدراما تنتبه لما تجيب في أي مسلسل وفيلم الكلام ده، لما بقول إنك تصيغ قيم المجتمع ده مش ضد الفن والإبداع.. هو أنت مش عارف تعمل إبداع من غير ما تجيب راجل بيضرب مراته وحد بيشتم! مش معقول.
7-أنا قلت لكم قبل كده إن الراجل لما يكلم الست يحط إيده ورا ضهره، فالناس ضحكت على كلامي.. خير! خلي إيدك ورا ضهرك واتكلم كويس معاها. لما حد يقول طب اضربها ولا لأ، تضرب إيه ده لا يجوز ولا يصح إن حتى في الشارع حد يؤلم سيدة بنظرة مش بس بكلمة.. ده كلام عجيب اللي بيتقال عن ضرب المرأة ده.