في 10 نقاط.. أمير طعيمة يلخص أزمة محمد صلاح مع المنتخب
علق الشاعر أمير طعيمة، على أزمة اللاعب محمد صلاح مع منتخب مصر، بعد هزيمة المنتخب في مباراة أمس الثلاثاء مع السنغال، وعدم تأهلهم لتصفيات كأس العالم قطر 2022.
لخص “طعيمة”، عبر حسابه على “فيسبوك، أزمة محمد صلاح مع المنتخب المصري، في النقاط التالية:
نرشح لك: إبراهيم عيسى: محمد صلاح يتعرض لحرب مروعة
1- “الناس بتتعامل مع صلاح إنه طالما هو أحسن لاعب في العالم يبقى دوره إن منتخب مصر يبقى أحسن منتخب في العالم، و مدرب المنتخب يبقى في إمكانيات كلوب، واتحاد الكرة يبقى زي الاتحاد الأوروبي والإنجليزي”.
2- “صلاح لما بيبقى مش في يومه، المنتخب بيخسر، أما في ليفربول فيه فريق متكامل بيشتغل وبيقدر يكسب”.
3- “فيه ناس أصلا حاقدين عليه من غير حاجة، دول اللي راقدين في الدرة، ومستنيين أي جنازة يشبعوا فيها لطم، إزاي واحد كان غلبان وأقل منهم في كام سنة يبقى من أهم و أغنى الرياضيين في العالم”.
4- “أنت مش بتعامل صلاح على أنه لاعب فذ، انت بتعامله على إنه سوبر مان، لدرجة إنك لمته لما كسبنا الكاميرون في ضربات الجزاء لمجرد إننا ما وصلناش لضربة الجزاء الاخيرة عشان يسدد و يكسبك هو، و نفس الامر في النهائي مع السنغال انت لمته علي ضربة جزاء مسددهاش”.
5- “صلاح مكانش في يومه فعلا إمبارح وضيع ضربة جزاء، بس انت نسيت إنك ضيعت 3 ضربات جزاء من 4، واللي دخلت أصلا دخلت بالتيلة، في مباراة اتلعبت في ظروف إرهابية غير مسبوقة تفوق بكتير مباراة الطوبة الشهيرة في 93، اللي اتعادت ومباراة امبارح مش هتتعاد عشان إحنا طيبين”.
6- “صلاح جاب هدف الفوز في الذهاب، يعني لو اتعادلت أو كسبت بضربات الجزاء كنت هتوصل، بس انت استنيته يطلع نار من بقه برضه ويتصرف في يوم من أسوأ أيامه كرويا”.
7- “مجرد وجود صلاح في الملعب بيخسر المنافس لاعبين أو تلاتة بيراقبوه وانت ما بتستفيدش من ده و بتستنى بردو صلاح اللي يحل بدل ما تستفيد من الزيادة العددية النظرية اللي بتبقى موجودة”.
8- “منتخب مصر الحالي منتخب جيد ومش ممتاز ولا جيد جدا، وجيد دي ما تخليش منتخب مصر يلعب نهائي أفريقيا ولا مباراة فاصلة من الأساس لأنك في السكة بتقابل منتخبات جيدة جدا وممتازة وحسابيا بتبقى فرصتها أفضل”.
9- “صلاح له دور كبير انك أصلا توصل للمباريات دي بجانب إن اللعيبة رجالة بتموت نفسها وما بتوفرش نقطة عرق”.
10- “فيه مجموعة من اللاعبين الموجودين مبدعين والبناء عليهم ممكن يخليك منتخب أفضل بكتير، ومش هقول أسماء احتراما للاعبين آخرين عملوا اللي عليهم في حدود إمكانياتهم”.
وكان قد عبر المدرب البرتغالي كارلوس كيروش، مدرب منتخب مصر، عن امتنانه وتقديره للاتحاد المصري على اختياره لتدريب منتخب مصر، موجها الشكر للاعبين وطاقم الجهاز الفني.
وذلك بعد تأهل منتخب السنغال على حساب منتخب مصر بعد الفوز بركلات الجزاء الترجيحية بنتيجة 3-1 في إياب الدور النهائي من تصفيات إفريقيا المؤهلة لـ كأس العالم في قطر 2022.
كتب “كيروش” عبر حسابه الرسمي على موقع التدوينات القصيرة “تويتر”: “انتهى الحلم.. لقد بذلنا قصارى جهدنا لكن اليوم لم يكن كافيا، من أعماق قلبي امتناني للاتحاد المصري على هذا الشرف لتدريب المنتخب الوطني.. إلى كل لاعبي وطاقمي تقديري وتواضعي شكرا جزيلا لكم ستكونون دائماً في قلبي”.
يشار إلى أن عقد كارلوس كيروش المدير الفني لمنتخب مصر، قد انتهى بشكل رسمي.
وتأهل منتخب السنغال لنهائيات كأس العالم للمرة الثالثة في تاريخه بعد المشاركة في نسخ 2002/2018.