أمير كرارة: اعتذرت عن بطولة فيلم "الممر" ولا صحة لخلافي مع أحمد عز
كشف النجم أمير كرارة، عن اعتذاره عن دور البطولة في فيلم “الممر” بسبب التزامه بالكثير من الأدوار التي كان يجسد فيها أدوار الضابط، قائلا: “اعتذرت عن الممر عشان كان عندي أدوار كتير وطالع فيها ظابط في كلبش 3، وحرب كرموز”.
وأضاف “كرارة” خلال حواره ببرنامج “حبر سري” مع الإعلامية اسما إبراهيم، على قناة القاهرة والناس، أنه كان يتمنى العمل مع المخرج الكبير شريف عرفة في الممر، متابعا: “كنت أتمنى اشتغل مع شريف عرفة لأن الممر فيلم كبير وأحمد عز عمله أحسن مني وزعلت إنى معملتش الدور وحاجة محترمة”.
نرشح لك: أمير كرارة: “مراتي متعرفش بكسب إيه لحد النهاردة”
وتابع: “اعتذرت عن مسلسلات قبل كده ولكن أنا كنت ببقى عارف بعمل إيه، وأنا اتحطيت فى دور الظابط 5 مرات وعملته في حرب كرموز والاختيار وكلبش، وكان كلهم مختلفين عن بعض ولكن قبل كده عملت مسلسلات شبه بعض زي حواري بوخاريست ومسلسلات مشابهة”.
نفى كرارة الشائعات التي تحدثت عن نشوب خناقة بينه وبين الفنان أحمد عز بزعم وجود تشابه بين فيلم الخلية وكلبش، قائلا: “مش عارف مين ورا إشاعة خناقتي مع أحمد عز بسبب تشابه فيلم الخلية وكلبش، وجالي تفاصيل إننا اتخانقنا مع بعض وتعجبت من الكلام”.
أردف أن أحمد عز بالنسبة له فنان كبير وجميل، متابعا: “محصلش أي كلام من كلام الخناقة ومفيش بنا حاجة وحشة واللى بيطلع إشاعات عايز يوقع بيننا”.
واستكمل: “اتقابلنا أنا وأحمد عز كتير مع بعض بعد هذه الشائعات وهو ساكن جنبي في التجمع وبنتقابل طول النهار فى الجيم والشارع واتكلمنا في هذه الإشاعة وبنسخر من الكلام ده”.