طارق الشيخ: بعاقب أولادي عشان ميدخلوش الفن

شدوى ممدوح
طارق الشيخ
قال الفنان طارق الشيخ، إنه يرفض دخول أولاده مجال الفن، موضحًا أن أولاده يحبون الغناء، ولكنه كان يعاقبهم لكي لا يدخلون هذا المجال.

أضاف “الشيخ”، خلال حواره مع الإعلامية راغدة شلهوب، في حلقة مساء أمس من برنامج “سابع سما”، المذاع عبر فضائية “النهار”: “رمضان يعني عيلة، لكن أنا رمضان مش بيفرق معايا، ومفيش حد مش بيوحشه ولاده بس لما يوحشوني، وأوحشهم دلوقتي أحسن ما يجي وقت ما يلاقونيش فيه خالص”.

نرشح لك: “نرفزة”.. طارق الشيخ يكشف سبب أزمته الصحية الأخيرة

أضاف: “هيجي وقت ابني مش هينفعني، ولا حد هينفع ابني، ده من الآخر.. الحاجة اللي عايز أقولها لأولادي، قدروا تعب أبوكوا عليكوا، مش هقولهم أكتر من كده”.

تابع: “في ناس كتير في مهنتنا معلموش أولادهم، وده غصب عنهم، لكن كانت أول حاجة بالنسبة لي، أني أعلم ابني كويس، رغم أن أغلب أولادي بيحبوا الفن، وكنت بعاقبهم عشان ميحترفوش الفن”.

أردف: “اللي معاه شهادة بيكون خط سيره مفتوح، ومش هيتعب في أنه يلاقي شغل، مهنتنا بالمزاج حسب مزاج الناس، إنما اللي معاه شهادة حسب مزاجه هو، هو اللي ماسك نفسه”.

استطرد: “حابب أقول لمراتي أهتمي بس بالأولاد، وعلى قد ما تقدري خليهم يحسوا بتعب أبوهم عليهم، عشان هي قصرت مع الأولاد واهتمت بيا أكتر”.

أما عن علاقته بالموزع إسلام ساسو، قال”الشيخ”: “فنان.. ومش ممكن يقول إني ممعيش فلوس أكمل الأغنية، الإختلاف بينا في الآراء بس، ده أنا واكل معه عيش وملح”.

كما أكد “الشيخ” أن مطرب المهرجانات حسن شاكوش، لا يقلده، موضحًا: “حسن شاكوش مش بيلقدني، مفيش حد بيقلد حد وينجح، والفنان هو اللي ميعملش مشاكل كتير، كتير المشاكل يبقى مش فنان، ومش قصدي بكلامي حسن بس، الحسبة عند الناس حسبة فلوس وبس”.

أكمل: “عمري ما فكرت في الفلوس، لأن من وأنا بكسب فلوس كان أى حد في الناس دي بياخد المصروف،و من قبل ما ياخد المصروف كمان وأنا بكسب الآلاف.. أنا معملتش ثروة، أنا عملت طارق الشيخ بعد ربنا، وعايش أحسن من أي حد في الدنيا”.