تصريحات ساخنة لـ شيرين رضا عبر قناة "القاهرة والناس"
حلت الفنانة شيرين رضا، ضيفة على برنامج “حبر سري” مع الإعلامية أسما إبراهيم، عبر شاشة “القاهرة والناس”، على مدار حلقتي أمس الثلاثاء واليوم الأربعاء.
تحدثت “شيرين” خلال اللقاء، عن رأيها في الهجوم على الإعلامي والكاتب إبراهيم عيسى، ومشكلة الزيادة السكانية في مصر، ورأيها في مصطلح “السينما النظيفة”، وأوضحت حقيقة تصريحاتها عن الأذان.
نرشح لك: شيرين رضا: لو اتعرض عليا مشاهد جريئة هعملها
وفيما يلي نستعرض أبرز تصريحاتها خلال اللقاء:
١- 70% من الراجل والسيدات في مصر غير مؤهلين للزواج ولديهم عادات سيئة متوارثة من أجيال بعيدة، قائلة: “مش كل الناس مؤهلة للخلفة وفي ناس بترمي أطفالها ودول ميستهلوش الأطفال و70% من الستات والرجالة مش مؤهلة يخلفوا”.
٢- “عمالين نخلف ونزيد ومش شايفين تنمية بتحصل عشان العدد، وفي أفكار لازم تتنسف من حياتنا ومفيش حاجة اسمها كل عيل بيجي برزقه ولو الراجل مشتغلش النهاردة رزقه هيجي منين، وعمرنا ما هنحس بكل المشروعات اللي بتحصل في بلدنا طول ما احنا بالتعداد ده”.
٣- المنزل الذي أعيش فيه يوجد فيه 11 قطة إضافة إلى قطة تأتي من الشارع وبغبغاء، مشيرة إلى أن لديها بيت آخر ويوجد فيه 80 قطة وكلبين، مضيفة: “أنا عارفة أسماء الـ80 قطة ولكن مش عايشة معاهم وعايشة مع الـ11 قطة فقط”.
٤- “عملت من التمثيل فلوس بس لازم أكون مقتنعة بالأدوار ولم أندم على أي شيء من أدواري وبعيش مع كل تفاصيل دوري من لبس وشعر وأداء ولازم اندمج بقلبي”.
٥- “في قصص مش محتاجة مشاهد جريئة وفي قصص محتاجة مشاهد جريئة ولو اتعرض عليا مشاهد جريئة أعملها وأنا رضيت أكون ممثلة، وفي حاجات مقبولة تتعمل لأننا مجتمع شرقي”.
٦- “زمان كان في مايوهات وبيكيني في السينما ودلوقتي حصل تغيير، والتغيير اللي حصل في المجتمع المصري هو التدين الظاهري وليس الحقيقي والدين عبارة عن رحمة وتفهم”، مؤكدة أن أصحاب التدين الظاهري أثر على المجتمع وحولوا الدين عنف.
٧- الأذان هو أكثر شيء يقرب الشخص إلى الله، لذلك يجب أن يكون صوت المؤذن جميلا، “مش المفروض أي حد يأذن، لأن ده أكتر حاجة بتقربك لربنا، يعني أنا مش بعرف أغني، مش كل صوت ينفع يغني، ولا كل صوت ينفع يأذن، لازم المؤذن يكون صوته حلو، وما خُفتش من الهجوم وقتها لأني مش بقول حاجة غلط.. في عهد الرسول صلى الله عليه وسلم، مكنش هو اللي بيأذن، وإنما كان بلال عشان صوته أحلى، هو مش عيب، عشان مش كلنا لازم نعرف نعمل كل حاجة”.
٨- “اللي يلفت نظري في الراجل أنه يكون بيضحكني، وأنا عندي في يومي حاجات سخيفة كتير، ولما تلاقي حد دمه خفيف ويضحكك دي ألذ حاجة”.
٩- “في إشاعات بضحك، وأنا وغادة عادل بنعمل فيلم مع بعض اسمه (بنات رزق) فيلم كوميدي ومش مقاطعين بعض”.
١٠- “أنا وأحمد الفيشاوي أصدقاء وهو بيحب يهزر، وهو كان بيهزر، ولكن أنا مش هتجوز، لا هو ولا غيره، ومعنديش وقت للجواز، وبصراحة مفيش حد اتجوزه، أنا حتى مش بتعاكس واللي عايز يتجوزني لازم يحارب ولا هو أنا هقدم نفسي على طبق من فضة”.
١١- “الهجوم على إبراهيم عيسى مفتعل وفيلم الملحد لا يتكلم عن الإلحاد بالعكس والناس المفروض تستنى الفيلم بيتكلم عن إيه، وأنا معرفش مصطفى درويش والهجوم كان ركوب ترند”.
١٢- “جوازات الوسط الفني مش بتكمل مش عارفه ليه؟! ومعرفش السبب، ممكن تبقى غيرة أو قلة المقابلة، ولكن في نماذج ناجحة زي منى زكي واحمد حلمي”.
١٣- “نور بنتي لما جت تقبل على فكرة الزواج كنت عايزاها تبقى سعيدة، وهي شايفة السعادة أنها تتجوز وأكيد هقف جنبها وقلت لها عشان تعيشي مع حد لازم تبقوا أصحاب”، مؤكدة أن العلاقة تفشل بين الرجل والمرأة حينما ينسوا أنهم أصدقاء وأهم شيء في العلاقة تكون الصداقة.
١٤- “نفسي اجيب شعري زيرو وقصت شعري قبل كده ونفسي اقصه من غير أن اتعرض لصدمة أو غيره من الظروف، دموعي مش قريبة ومفيش اي حاجة بتخليني اعيط ولا حتى في التمثيل، والعياط مش بيرجع أي حاجة تاني ولا عيطي على بابا اللي بحبه هيرجع تاني”.
الجدير بالذكر أن الفنانة شيرين رضا تشارك في رمضان 2022، بمسلسل “شغل فى العالي”، تدور أحداث العمل في إطار كوميدي، حول صديقتين مقربتين هما فيفي عبده، وشيرين رضا، يتعرضان لكثير من المواقف الكوميدية سويًا .
قناة “النهار” كانت قد نوهت، عن تغيير اسم مسلسل “شغل عالي” قبل عرضه بساعات ليصبح “شغل في العالي”، بناء على شكوى تقدم بها البرنامج الذي يحمل نفس الاسم .
تقدم الإعلامية أسما إبراهيم برنامج “حبر سري” في رمضان يوميًا، في تمام الساعة 6:20 مساءً بتوقيت القاهرة، و5:20 بتوقيت المملكة العربية السعودية.