بعد الإشادة بشخصية "نفادي".. حاتم صلاح يوجه الشكر لصناع "الكبير أوي 6"
محمد هيثم
أعرب الفنان حاتم صلاح، صاحب شخصية “نفادي” في مسلسل “الكبير أوي 6″، عن سعادته البالغة بالمشاركة في المسلسل، موضحًا أنه كان يشاهد الأجزاء الخمس السابقة من المسلسل ولم يكن يتوقع أن يظهر فيه.
كتب “صلاح” عبر حسابه الرسمي على موقع التواصل الاجتماعي “فيس بوك”: “الكبير أوي ٦.. بقعد أتفرج عليها لحد قبل رمضان بتفرج على الخمس أجزاء ومش بصدق أن هايجي رمضان وأقف وسط الممثلين العظام دول كوميديانات مصر اللى كتبوا تاريخ في الكوميديا”.
نرشح لك: صابرين حول تغاضيها عن تعليقات رامز جلال: يعتبر من العيلة
تابع: “أولا فضل ونعمة من ربنا كبير، أنا والله ماليا يد فيه بدون حول مني ولا قوة لو في حد حب المسلسل أولا وحب شخصية (نفادي) ثانيا، بشكر كل الناس اللى فرحتلي كاني واحد من عيلتهم وبشكر أصحابي فرقة ١٩٨٠ وأنت طالع وكنا بنسهر على القهوة بالساعات عشان نروح نقول إيفيه، وبشكر الأستاذ أحمد الجندي اللي خلاني أقول كل كل اللي في نفسي ويزودلي عليه وأي ممثل كوميدي حظه وحش لو ما بيشتغلش معاه”.
أضاف: “بشكر كل فريق الإخراج أستاذ محمد خيري اللي كان معايا من أول أوديشن لحد النهاردة وأصحابي وأخواتي كل كرو الإخراج حسني وأحمد ونور ومحمد بيومي ومحمد علاء وصالح وحسين وعم حسن قناوي مصحح اللهجة، أنا كنت بحس أني سعيد أول ما أدخل اللوكيشن وكل فريق الإنتاج بقيادة الأستاذ شادي علام وحاتم سعيد وأستاذ عمرو عاصم مونتير المسلسل اللي كلمني مكالمة أنا مش هنساها طول حياتي”.
أردف: “حقيقي أنا كنت مستريح قوي وحاولت أطلع كل اللي عندي يارب يكمل نجاح المسلسل على خير ونكون قدرنا وبنقدر نرسم الضحكة على وشوش الناس اللى بتتفرج أستاذ أحمد مكي الكبير أوي في كل حاجة مهما قلت والله ما عارف أعبر ولا أطلع ربع اللي جوايا تجاه الناس دي وما ينفعش أتكلم عن كل الناس الحلوة وما تكلمش عن أخويا وصاحبي الفنان الكبير أستاذ أحمد أمين اللي قدمنى للناس هو وأستاذ علاء إسماعيل في برنامج أمين وشركاه ووقف جنبي، ولحد يومنا هذا جمايله مغرقاني كأني واحد من عيلته وفرقتي فرقه ١٩٨٠ وأنت طالع، وجمهور ١٩٨٠ وأنت طالع.. أنا مش عارف أتكلم وملغبط بس بحبكوا أوي.. اللهم ديمها نعمة”.
قصة مسلسل الكبير أوي 6
يعود مكي بدرامته الشهيرة “الكبير قوي”، حيث تدور أحداثه في إطار كوميدي، حول عمدة أحد القرى، والمحيطين به، وتغيب عن هذا الجزء دنيا سمير غانم التي شكلت مع مكي ثنائية ناجحة في الأجزاء السابقة، في دور “هدية” زوجته.
أبطال مسلسل الكبير أوي 6
المسلسل من بطولة أحمد مكي، ورحمة أحمد، وهشام إسماعيل، ومحمد سلام، وبيومي فؤاد، وعدد من ضيوف الشرف، وهو من إخراج أحمد الجندي، وتأليف مصطفى صقر، وإنتاج سينرجي.