تعليق سمية الخشاب على أزمة محل الكشري
علقت الفنانة سمية الخشاب، على الأزمة التي أثيرت مؤخرا، بشأن منع سيدة مسيحية من تناول الطعام هي وابنتها في محل كشري شهير قبل أذان المغرب.
كتبت “الخشاب”، عبر حسابها الشخصي على موقع “تويتر” الآتي: “مش عايزين حد ياكل قبل الفطار يبقي تقفلوا محلاتكم والناس اللي بتشتغل ومش عايزة تمارس شغلها متاخدش مرتبها وترتاحوا وتريحوا، كفاية ازدواجيه بقى والذي منه”.
نرشح لك: بعد غياب.. ظهور تلفزيوني لهالة سرحان في “حبر سري”
تابعت: ” لما مطعم يكون فاتح لو أي حد طلب أكل يبقي من حقه ياكل براحته، مادام بتشتغلوا وبتاخدوا مرتب يبقى تعملوا شغلكوا صح مش عشان عارفين إنه رمضان وإنه معظم الناس صايمة يبقى تفرضوا ده على الناس اللي مش صايمة لمجرد إنكم مكسلين تشتغلوا، مش عشان معتقدهم مختلف وبيراعوا يبقي حق مكتسب”.
أضافت: “متفرضوش معتقداتكم أو طقوسكم أو أي سلوك على غيركم عشان ده أكبر مظاهر التخلف”.
كانت قد انتشر على مواقع التواصل الاجتماعي خلال الساعات الماضية، منشور لسيدة تحكي فيه تفاصيل منعها هي وعائلتها من تناول الطعام بأحد المطاعم قبل أذان المغرب.
كتبت سيلفيا بطرس عبر حسابها على “فيسبوك”: “نزلت النهاردة جبت بنتي من الحضانة، بعدما خلصنا بنتي قالت أنا جعانه، وبما اننا صايمين ولقينا كشري التحرير فاتح وشغالين قولنا ناكل ونروح، قعدنا وطلبنا وجه الأكل، ويادوب البنت بتاكل أول معلقة لقينا واحد من العاملين جاي بيقول ممنوع الأكل قبل المغرب، قولت له يعني ايه ؟ مش ده مطعم ومفتوح والناس قاعدة، قالي أه الناس تقعد بس محدش ياكل قبل الأذان”.
أضافت: “قولتله انت صايم ومستني الأذان، براحتك أنا مش صايمة للمغرب وقاعدة في مطعم والأكل قدامي إزاي ما كلش، قالي هو ده النظام.. ولقينا واحد تاني جاي غالبا مديره وبيكرر نفس الكلام، إحنا بقى مطلوب مننا نطلع معلقة الأكل من بوء البنت؟ ونقنعها إنها ماتاكلش في المطعم علشان فيه ناس قرروا يفرضوا ده على غيرهم؟”.
ليرد المطعم المذكور في بيان نشره عبر “فيسبوك”، كالأتي: “توضيح هام لعملائنا الكرام بخصوص ما تم اتهام إدارة كشرى التحرير به، من أمس لليوم وهو اتهام غير صحيح، العميلة المحترمة شرفتنا في فرع سراي القبه الساعة ٥:٥٠م لطلب أوردر تيك أواى ودفعت الحساب للكاشير واستلمت الأوردر”.
تابع: “العميلة لم تجلس داخل الصالة لأن الصالة مغلقة في هذا الوقت ولم يتم منع العميلة أو الطفلة، وإذا حدث غير ذلك فهو خطأ فرد وليس منظومة، لقد تم التواصل مع العميلة اليوم وتوضيح سوء الفهم وتقبلت الاعتذار”.