أبرزها عن العلاج النفسي وتقبل الموت.. أبرز تصريحات أمينة خليل في "أدينا بندردش"
محمد هيثم
أمينة خليل في أدينا بندردش
حلت الفنانة أمينة خليل ضيفة على برنامج “أدينا بندردش” وتقدمه الإعلامية شيرين عرفة، ويذاع على حسابها الرسمي بمواقع تبادل الصور والفيديوهات “إنستجرام“.
تحدثت “خليل” أثناء الحلقة عن طريقتها للإكثار من الحمد، وعن تجربتها مع الطبيبة النفسية، كما انتقدت فكرة إخفاء المرأة للطموح والإنجاز، وجاءت تصريحاتها كالتالي:
1- “عملت تدريب زمان عشان أعود نفسي على الحمد.. كل يوم الصبح 10 حاجات بحمد ربنا عليهم، و10 حاجات قبل ما أنام بحمد ربنا عليهم.. وبالتالي كلمة الحمد لله بتبقى على لسانك كتير وبتبتدي تطلعي الطاقة الحلوة دي في الكوكب وإنك ممتنة جدا للعالم فالعالم هيرمي عليكي خير.. حبي الكوكب الكوكب هيحبك.. لو أنا بطلع طاقة سلبية طول الوقت ازاي هشوف أي حاجة حلوة في الحياة”.
2- الموت مثل الحياة فهو موجود ويجب علينا تقبله: “هيحصلنا وهيحصل للي حوالينا غصب عننا، فمينفعش نبقى خايفين أوي من حاجة طبيعية جدا، لازم نوصل لسلام كده تجاهه وده صعب.. أكيد الفراق أصعب حاجة في الدنيا بس الفراق هو اللي بيوجع، قهرة الخضة اللي بتوجع والذكريات وهكذا.. إنما الموت نفسه مش مخيف”.
3- “في ستات مبيحبوش يبينوا طموحاتهم وإنجازاتهم عشان ينجذب لهم الرجال، شوفتها قبل كده وعملتها قبل كده، بس مش صح، أصل هتمثلي الكدبة وتفضلي مصدقاها لحد امتى؟ لو أنتي قوية مش المفروض تقللي من نفسك عشان حد تاني يحس إنه أحسن منك.. ولو جربتي تعمليها مش هتعرفي تفضلي محافظة على الوش ده، لأن هتتحطي في مواقف هتبان قوتك، فـ ليه نمثل، ما نعيش حقيقتنا وإننا شخصيات قوية”.
نرشح لك: تصريحات ساخنة لـ شيرين رضا عبر قناة “القاهرة والناس”
4- “البنت اللي بتتكلم وترد ساعات بتتفهم إنها بتقاوح أو بتعند، وده مش حقيقي، لأن في حاجات معينة لازم تقنعني وتتكلم معايا فيها، متاخدنيش شخشيخة أو تحركني بدون نقاش، أنا ممكن أجي معاك بس اقنعني.. أنا اتحطيت في المواقف دي ومبحبهاش، إن ألاقي بعض الرجالة يتعاملوا مع الست باعتبارها شيء بلا رأي أو فكر.. أنا عندي عقل وأنت عندك لسان وعقل ربنا إداهولك فممكن نتناقش”.
5- مريت بفترة كنت غاضبة، ولا أريد العمل، ولم أكن سعيدة، فذهبت لطبيبة نفسية لإستعادة روحي: “الدكتورة بتاعتي علمتني إنك كبنت لازم تعرفي تدافعي عن نفسك وتعرفي قيمتك، في بنات كتير مش مقدرين قيمتهم فبيتقبلوا حاجات كتير أوي على نفسهم مش المفروض يتقبلوها، وبيستحملوا لحد ما ينهاروا.. لازم نعرف إمتى نقول لأ.. ده أنا عملت مسلسل كامل اسمه (ليه لأ).
6- لن أقبل الاستغلال بأي شكل كان، وهناك أشخاص كثيرة استغلتني ولكني اكتشفت ذلك بعدما حدث.
7- الروح هي التي تعطي القوة: “لازم تبقي فاهمة روحك دي إيه، الروح دي هي الباور بتاعك، لازم تحرسي الباور ده زي ما بتخلي بالك من بيتك والبيبي بتاعك وجوزك وكلبتك ومامتك.. الروح دي بتكبر زي البني آدمين فبتتعرض لمواقف ممكن تلخبطها وتضايقها وتزعلها.. الحاجات دي بتؤثر على الروح، لذلك عايزين هدفنا يبقى إن روحنا تبقى كاملة، لأن لما تشيلي منها بتنقص وبتبقى ضعيفة، إنما لو كل ما يحصل حاجة تضايقك تروحي مرجعاها تاني لطبيعتها هتفضل كاملة”.
8- “مبحبش ألاقي الناس تفضل تقول إن الراجل ميعيطش.. ليه؟ دي موروثات بتكبت مشاعر الرجل ومبتديهوش حرية التعبير عن مشاعره، إحنا حقنا نحس بكل المشاعر ونعبر عنها، بس ده لا يمنع إن مش من حقنا إننا نستسلم للمشاعر السيئة، لأن ربنا مدينا حاجات حلوة كتير جدا في الحياة فلازم نرضى”.
View this post on Instagram