كمال أبو رية: بحس ربنا راضي عني
شدوى ممدوح
كمال أبو رية
تحدث الفنان كمال أبو رية عن علاقته مع الله، ووصفها بأنها في غاية الجمال، كما روى أصعب موقف مر به في حياته وأكد أنه لن ينساه أبدا.
قال ”أبو رية” خلال لقائه في برنامج “كلم ربنا” مع الإعلامى أحمد الخطيب المذاع على “الراديو 90 90”: ”أنا علاقتي بربنا حلوة وجميلة، وانا دايما بستشعر إن ربنا راضي عني وحاببني، والدليل على كدة إني لما بغفل عن ذكره أو أتصرف تصرف لا يرضيه بحس برد فعل فيه إنذار أو تحذير”.
نرشح لك: مروة عبد المنعم: لم أتزوج مصطفى قمر
أضاف: ”الإنذار أو التحذير ده بيبقى من خلال موقف يحصلي، عثرة في طريق شغلي، مشكلة في حياتي، ولو ربنا مش راضي عني مش هيعمل كده، وأنا واثق إن ربنا بيحبني وراضي عني.. وأتعامل مع الناس بالذوق والأخلاق والضمير الحي، وأنا أعشق قيمة العدل، وطول الوقت بقول الحمدلله علاقتي بربنا جميلة”.
استكمل: ”في موقف صعب مريت بيه لن أنساه طوال حياتي، كان في سنة 1988، وقتها كانت مراتي الفنانة ماجدة زكي حامل، وأنا كنت في بداية حياتي ومش معايا فلوس للولادة، وكان المبلغ المطلوب 3600 جنيه، مبلغ كبير وقتها”.
تابع: ”وقتها كنت قاعد في بيت أهل زوجتي ففردت السجادة وبصلي، ومكنش عندي شغل ولا أنا ولا هي، وأنا ساجد سمعت صوت حد بيقولي أنت فين عايزينك في شغل، وبمجرد ما خلصت صلاة جرس تليفون رن، رديت لقيت سكرتير المنتج مطيع زايد بيقولي يلا نسافر الأردن عشان عايزينك في مسلسل، وهو ده الصوت اللي سمعته لما كنت بصلي، وأجري في المسلسل ده كان 3600 دولار كان ضعف المبلغ اللى كنت محتاجه”.
