طارق لطفي يتحدث عن صعوبة تجسيد شخصية "خلدون"
كشف الفنان طارق لطفي عن تفاصيل شخصية “خلدون” التي جسدها في مسلسل “جزيرة غمام” الذي عرض في رمضان الماضي، قائلا: “خلدون مش بني آدم مش إنسان، يعني الكاتب عبد الرحيم كمال عنده ميزة إنه لما بيكتب دور شر بيكتبه كـ بني آدم كإنسان، فيه جزء خير وفيه الجزء الأكبر الشر علشان كده بيتصنف شرير”.
أوضح”لطفي” خلال لقائه مع الإعلامية لميس الحديدي في برنامج “كلمة أخيرة” المذاع على شاشة ON: “خلدون مش بني آدم مفيهوش الأجزاء الإنسانية اللي بتبان في البني آدم العادي خالص، هو رمز، أنا شايفه كده خلدون كرمز، وأعتقد إن الأستاذ عبد الرحيم كان كاتبه كرمز”.
نرشح لك: رحمة أحمد: تعرضت لنوبات بكاء أثناء تصوير “الكبير”
استكمل: “معندوش لحظة مشاعر واحدة خالص، مكسرهاش ولا مرة، ولا مع العايقة ولا مع زين المواصف، كان صعب أوي بقى على الممثل إن خياله هو اللي هيبني الشخصية مش حاجة تانية مفيش مرجع فهو لازم يبنيه بالشكل ده، كنت بكلم أستاذ عبد الرحيم بقوله مكنتش عارف هجيبها ازاي منين وكنت سايبها كده افكر في الشكل وبعدين الصوت وبعدين جت الشخصية فهي صعوبتها إنه فعلا مش بني آدم”.
المسلسل من بطولة طارق لطفي، ومي عز الدين، وفتحي عبدالوهاب، ووفاء عامر، وأحمد أمين، ومحمد جمعة، ورياض الخولي، وعدد كبير من ضيوف الشرف على رأسهم عبدالعزيز مخيون، وهو من إخراج حسين المنباوي، وتأليف عبد الرحيم كمال، وإنتاج سينرجي.