نصائح الكاستينج دايركتور محمد نبيل منيب للممثلين الشباب
قدم الكاستينج دايركتور محمد نبيل منيب نصائح للممثلين الشباب، أو الراغبين في امتهان التمثيل عبر حسابه على “فيس بوك”.
كتب “منيب”، 26 نصيحة، معلقًا عليها: وأنت بتقرر تكون ممثل لازم تبقى عارف الآتي..
نرشح لك:إيمان العاصي عن أغنية “أنا تمام”: مش صوتي وحقي هاخده
١ – التمثيل مش مهنة من لا مهنة له.. ومش مهنة للي هدفهم الشهرة
٢ – الشهرة مش أحسن حاجة في الدنيا، بالعكس عيوبها أكتر من مميزاتها.
٣ – التمثيل مهنة للناس اللي متعتهم في التمثيل واللي مقابل ده هيتحملوا حاجات كتير تانية صعبة جدا.
٤ – التمثيل مش الخليج.. يعني انت مش هتروح تمثل عشان تكوّن نفسك!
٥ – لازم يكون عندك مصدر دخل تاني تماما غير التمثيل.
٦ – الطريق طويل ومرهق ومش محدد.. مفيش طريق واحد للوصول.
٧ – ممكن حد يمشي طريق ويوصل وحد تاني يمشي نفس الطريق وميوصلش.
٨ – التمثيل مش مهنة سهلة.. بالعكس مهنة متعبة صحيا ونفسيا ولكن ممتعة.
٩ – محدش هيوصل عشان بيبعت ماسيچ لممثل أو أي حد في الوسط يقوله: (اديني فرصة، أنا ممثل شاطر أوي جربني) طرق السعي كتير جدا “بس ده مش منهم”.
١٠ – لازم يكون عندك مصدر دخل تاني تماما غير التمثيل.
١١ – مفيش حاجة اسمها أنا تعبت أنا بسعى بقالي ٦ شهور ولا سنة ولا سنتين.. السعي في المهنة دي ممكن يستمر سنين طويلة جدا المهم الإصرار والمثابرة والتطور والمواكبة.
١٢ – الأهم من السعي إنك تكون جاهز.. إنك تكون بتدرب كتير وبتقرا كتير وبتتفرج كتير وبتشتغل على تطوير موهبتك وشكلك وتطوير طرق سعيك.. وتكون مختلف عن الآلاف اللي بيسعوا في نفس الحلم.
١٣ – رحلة التمثيل مش رحلة فردية.. التمثيل زي ما هو عمل جماعي في أغلب أحيانه فـ رحلة السعي فيه رحلة جماعية.. تحب الخير فيه لكل اللي حواليك وتحاول تسندهم لأن هما اللي ممكن يبقوا سندك فـ يوم وممكن هما اللي يزقوك لقدام.. وعامة رحلة السعي الجماعية بتوسع وبتزود فرص الوصول كل ما زاد عدد اللي بتسعى معاهم.
١٤ – مش عشان دمك خفيف أو بتعرف تقلد شخصيات أو عشان شكلك حلو أو عشان صحابك قالولك أنت لازم تمثل يبقى أنت كده ممثل.. أعرف ناس قعدوا سنين طويلة يسعوا للاسف بسبب حاجات زي دي وللأسف معندهمش الموهبة ولكن موهومين فضيعوا عمرهم في اتجاه غلط.
١٥ – لازم يكون عندك مصدر دخل تاني تماما غير التمثيل.
١٦ – الممثل لازم يكون مثقف.
١٧ – الممثل لازم يكون عنده قدرة عالية على تحمل صعوبات الرحلة وصعوبات ما بعد الوصول.. وقدرة عالية على تحمل النقد اللاذع للأسف.
١٨ – مفيش ممثل شاطر بيقول على نفسه أنه ممثل شاطر.
١٩ – مفيش حاجة اسمها انا أتدربت وجاهز.. الممثل الحقيقي طول الوقت بيتعلم وبيتدرب.. طول الوقت بيطور من نفسه وبيتابع مدارس التمثيل المختلفة.. لأن التمثيل نفسه كل يوم بيتطور وبيتغير وبيظهر فيه مدارس جديدة.
٢٠ – لازم يكون عندك مصدر دخل تاني تماما غير التمثيل.
٢١ – أغلب الممثلين مش بياخدوا ملايين زي ما أنت فاكر.. أغلب الممثلين بيصرفوا كتير ماديا ونفسيا ومن صحتهم على الشغلانة دي.
٢٢ – التمثيل ملهوش علاقك بأنك بتعرف تحفظ كويس وتسمع اللي حفظته.
٢٣ – في آلاف غيرك بيسعوا في نفس الاتجاه منهم الحقيقي الموهوب ومنهم اللي فاهم غلط وللاسف عامل زحمة بتخلي ظهورك أصعب.. اسعى تكون مختلف وواضح ومميز وفارق عن كل دول.
٢٤ – اسعى صح ومتستناش الفرصة تجيلك لحد البيت.. لأن الأقل موهبة قد يكون أكثر سعياً وبالتالي هو اللي ياخد الفرصة.
٢٥ – الممثل لازم رؤيته ومشاهدته لكل شيء تكون مختلفة وتحليلية، سواء لعمل فني، أو للشخصيات اللي بيقابلها في حياته.. أو للأحداث اللي بتدور حواليه.
٢٦ – اه في واسطة زي أي شغلانة في الدنيا، بس مش كل اللي بيشتغل بيشتغل بالواسطة وإلا مكانش الموهوبين الحقيقيين وصلوا.. قول دايما لنفسك (أنا قادر أوصل زيهم).