مصطفى قمر: لو كنت منتج هقدم أغنية تجمع تيام قمر ونور النبوي

كشف الفنان مصطفى قمر العديد من كواليس أعماله، وذلك خلال احتفال راديو إنرجي 92.1، به حيث كان نجم شهر مايو وذلك في حلقة اليوم الثلاثاء مع سلمي قاسم.

أشار “قمر” إلى تحضيره عدد من الأغاني الفترة القادمة، قائلاً: “في أغنية سينجل سيتم طرحها في الصيف باسم (وصلولوه أنه غايب)، بجانب المزيد من الأغاني الجاري التحضير لها والتي ستطرح على طريقة الفيديو كليب”.

نرشح لك: يستخدم في كافيهات الإسكندرية والقاهرة.. عمرو دياب يحذر من استغلال اسمه

كما أوضح تفاصيل أزمة برنامجه “5 نجوم”، قائلاً: “بعض الأمور وصلت للمحكمة الآن والدعاية ماعجبتنيش ولازم أخد حقي ويكون في اعتذار عن اللي حصل بخصوص الدعاية، وسأقدم كل الأوراق التي تثبت حقي”.

وعن السينما وآخر أفلامه “فين قلبي”، قال إن الفيلم تعرض للظلم، موضحا: “أنا قدمت اللي أنا عايزه والفيلم اتعب فيه جامد وحالياً سيتم عرضه في أكثر من قناة”، مشيرا إلى أنه كان من المقرر له أن يشارك في السباق الرمضاني الماضي ولكن بسبب تأجيل التصوير والتأخير في بدء التحضير الجيد للمسلسل تم تأجيله وتغييره فكرته.

تابع حديثه عن الأعمال الغنائية التي قدمها ومنها أغنية “زحمة الأيام”، قائلاً: “بعتبرها اتعملت لتكريم الشاعر سامح العجمي والملحن أشرف سالم اللي اتوفوا وإحنا شغالين على الأغنية، وكنت متأثر جدا وإحنا بنصورها، الجمهور كان في حاجة إلى هذا التعاون”.

وخلال الحلقة عرضت سلمي عدد من الأسئلة على مصطفى قمر، بعنوان “لو كنت”، في هذا المنصب أو الموقف كيف سيكون قراره، وهنا قال قمر: “لو كنت نقيب المهن الموسيقية كنت هراجع على الكلام الخاص في بعض الأغاني، لكن المزيكا مكنتش هتدخل فيها، مفيش نوتة قليلة الأدب، و لو كنت منتج هقدم أغنية تجمع تيام قمر ونور النبوي، ولو هنتج كليب كتير إني أحط ميزانية 3 أو 4 مليون و لكن لو في رعاة ممكن أعمل كده وأحاول أرجع الفلوس دي عن طريق المشاهدات”.

استكمل: “لو كنت أغنى واحد في العالم هساعد الناس اللي في المجاعات، والحيوانات هيكون ليها نصيب من المساعدات”.

أيضا قال مصطفى قمر: “أغنية (يا طبطب يا ادلع) اتعرضت عليا بس قولت لأيمن بهجت قمر وطارق مدكور يدوها لنانسي عجرم.. حسيت إنها لايقة عليها وفعلا كسرت الدنيا معاها”.

أردف: “(هنقول إحنا لسه حبايب) خدتها من عمرو مصطفى وبعدها قالي إن عمرو دياب عايز يغنيها فقولتله ياخدها بس لو مش هيقدمها هاخدها تاني.. وعمرو دياب غناها فعلا مرة في حفلة ومحسهاش”.

وعن السوشيال ميديا ومطربي الراب، قال مصطفى قمر: “مش دايما بتابع السوشيال ميديا.. حاجات كتير مبتعجبنيش لأنها بتبقى متحررة اوي، وأحيان كتيرة مش بتعجبني فيديوهات التيك توك”،
وبتعليقه على أغاني الراب، قال: “ويجز ومروان بابلو والناس دي عاملين شغل كويس لكن الموضوع اتطور وبقى في شتيمة في الأغاني ودي حاجة مش مقبولة ومش مفهومة بالنسبة لي.. الفن ألذ من كده بكتير”.