بعد توثيق حسايها.. حنان ترك تتوعد من يتحدث باسمها
أعلنت الفنانة حنان ترك، عن توثيق صفحتها الرسمية على موقع التواصل الاجتماعي “فيس بوك“، وذلك كخطوة أولية لمواجهة من يتحدث باسمها عبر مواقع التواصل الاجتماعي.
قالت “ترك” خلال لايف عبر حسابها: “ارجوكم لو لقيتوا أي صفحة تانية بتتكلم باسمي، ساعدوني واعملوا عنها ريبورت.. لأن كان في صفحات كتيرة جدا منتحلة اسمي وبتتكلم باسم الدين والسياسة وحاجات غريبة جدا أنا ماليش علاقة بيها ولا عمري هتطرق للمواضيع دي وأنزل بوستات بالشكل دا، أولا لأني سياسيا جهلة جدا ومعنديش وعي سياسيي يقولكم أعملوا كذا، معنديش الثقافة السياسية اللي أنظر بيها.. ثانيا الدين أنا لا بحلل ولا بحرم وأنا أصغر بكتير من إني أفتي في دين ربنا سبحانه وتعالى، ودا له ناسه”.
نرشح لك: حنان ترك: أنا أصغر من إني أفتي
تابعت: “أنا صعب عليا نفسي قوي لما صحابي وحبايبي اللي يعرفوني كويس زعلوا مني، من حاجات أنا ماليش علاقة بيها وعمري ما قولتها.. يعني اتاخدت قوي من جوايا، وقولت معقولة هما نسيوني قوي للدرجة دي! يعني ممكن يفتكروا إني ممكن أقول الكلام دا! فبصراحة خدت على خاطري منهم قوي، بس الحمد لله أن ربنا أنصفني وعرفت أوثق الصفحة بتاعتي والصفحات التانية اللي كانت بالملايين معظمها تراجع، بعد ما كانوا بيتكلموا باسمي في كل البوستات ودي حاجة أنا مش هسكت عليها، ولو أي حد بيتكلم باسمي يشيل البوست لأني هبتدي أخد إجراءات ومش حابة يكون دا موجود”.
أضافت: “قررت إني أبقى موجودة بدل الإشاعات، وعملت قناة على اليوتيوب لسه مش عليها حاجة، بس هتواصل معاكم من خلالها لو حابين تسألوا عليا وتعرفوا عني”.
في سياق آخر وجهت الشكر لمن ساندها في أزمتها الصحية الأخيرة، قائلة: “عايزة أشكر أسرتي اللي وقفت جنبي في مرضي الأخير، وكل أصدقائي اللي سألوا عليا، ود. أشرف زكي اللي كلمني وأطمن عليا وقالي لازم أسجل رسالة بصوتي عشان أطمن أصدقائي وعملت كده بالفعل، وفي ناس كتير تواصلت معايا بشكرهم قوي، وبشكر الجمهور اللي دعواته بفضل الله بقيت أحسن بكتير وكويسة جدا”.
