أحمد موسى لمحمد الشوربجي: اللي عملك هيعمل غيرك

علق الإعلامي أحمد موسى، على اختيار بطل الإسكواش محمد الشوربجي تمثيل إنجلترا بدلا من مصر في البطولات الدولية.

قال “موسى” خلال حلقة اليوم الاثنين، من برنامجه “على مسئوليتي“، المذاع عبر شاشة “صدى البلد”: “محمد الشوربجي بيقول إنه مخدش أي تكريم من البلد ومحدش دعمه، طب هو لما رئيس الجمهورية كرمك ده دعم ولا مش دعم؟ لما بتاخد أعلى وسام في الرياضة ده مش دعم؟ يا سيدي إلعب باسم إنجلترا ومبروك عليك مفيش مشكلة، لأن اللي عملك هيعمل غيرك.. وعلى فكرة مصر رقم واحد في لعبة الاسكواش”.

نرشح لك: لميس الحديدي عن قرار لعب “الشوربجي” لـ إنجلترا: علينا النظر بموضوعية

أضاف: “جايز يكون هناك بعض الأزمات، وجايز يكون شاف حاجة تانية مش موجودة في بلده.. بس هل حد كرمك في أي مكان زي التكريم اللي خدته من مصر؟ جايز إنجلترا هتديله فلوس أكتر وهيجبوله مدرب خاص وطيارة خاصة وطبيب خاص.. طب هل هو طلب ده أصلا ومتعملش هنا؟”.

أردف: “لكن بردو الاتحاد المصري مع نادي هليوبوليس مع وزارة الشباب والرياضة، لازم يقولولنا إيه الحكاية وهل في تقصير عندنا لازم نعالجه؟”.

في نفس السياق، علق عاصم خليفة، رئيس الاتحاد المصري للإسكواش، على اختيار بطل الإسكواش محمد الشوربجي تمثيل إنجلترا بدلا من مصر في البطولات الدولية، وأنه كان معتمدا على نفسه فيما وصل له.

وقال “خليفة”، خلال اتصال هاتفي مع الإعلامي سيد علي ببرنامج “حضرة المواطن” المذاع عبر فضائية “الحدث اليوم”، مساء اليوم الإثنين، إن محمد الشوربجي يبلغ من العمر 31 عاما، وغادر مصر إلى إنجلترا وعمره 14 عاما، مضيفا أن الشوربجي تعلم الإسكواش في مصر وتدرب عليه في مصر.

وأضاف: “محمد ابني ومقدرش أجرح فيه، وهو عايز يعيش خارج مصر، واتخذ قرار يعيش في إنجلترا”.
وتابع: “مش هحاسبه على كلامه إلا لو هطلع المستندات وأقول استفاد من مصر إزاي، ولكنه ناكر لهذا”، مشيرا إلى أن محمد شاب مجتهد وموهوب وله اختياراته، وله شقيق آخر يدعى مروان ويرغب أن يعيش في مصر.