لبلبة: رفضت الزواج بسبب حبي لجمهوري

هدير عبد الوهاب

قالت الفنانة لبلبة، إنها دخلت مجال الفن وهي في مرحلة الطفولة، وأبدت استغرابها من موافقة والدتها على عملها وهي بعمر 13 عاما.

قالت لبلبة خلال استضافتها في برنامج “أسرار النجوم” مع الإعلامية إنجي علي، على إذاعة “نجوم إف إم” أمس الخميس: “إزاي وأنا صغيرة أوي وقبل ما أعدي مرحلة الطفولة والدتي وافقت إن أنا أشتغل، أنا عملت فيلم النغم الحزين وكان عندي 13 سنة، وقتها مكنتش أقدر أقول لأمي إزاي شغلتيني وأنا في السن المحير ده، ولما كبرت قالتلي أنا عملت كده عشان متبعديش عن الجمهور وفجأة يلاقوكي كبرتي، أنتي فضلتي قدام الناس في كل مراحلك”.

نرشح لك: لبلبة: كان نفسي أتجوز عاطف الطيب

أشارت إلى أن شكلها لم يتغير بمرور الزمن وهذا شيء لا دخل لها به وإنما بإرادة الله، مؤكدة على أنها لا تحاول إجراء “نيولوك” لأن الناس تعودت عليها بشعرها القصير. مردفة: “كل الستات يحبوا يداروا ديفوهات بالشعر الطويل، لكن أنا مابيهمنيش أنا قدام المرايا في حاجات ممكن متعجبنيش في شكلي لكن الجمهور لما بيحب فنان بيحبه بالعيوب”.

أوضحت أن والدتها خيرتها في صغرها بشأن استكمالها الفن، وقررت أن تستكمل وتستمر في حياتها الفنية، وأخبرتها والدتها أن النجاح يحتاج إلى تضحية. متابعة: “دايما أفكر في جمهوري إللي حبني وأداني ثقته لازم أحافظ على ده، ولو أتعرض عليا دور مش قد كده بقول طب الجمهور هيقول إيه؟ لكن البعض بيقولي اعملي أعمال نص نص وأعمال حلوة والجمهور بينسى لكن لأ الجمهور مابينساش، وده بيبقى متثبت عليكي طول مشوارك الفني والتليفزيون بيعرض كل الحاجات القديمة فالناس بتشوفني كنت إزاي وبعمل إيه”.

أكدت على أنها تحترم جمهورها وتتعامل معه كأنها في علاقة حب وتضحي من أجله، مضيفة: “أنا بعمل حساب لجمهوري جدا لأن أنا وجمهوري زي اتنين بيحبوا بعض لازم عشان إللي بتحبيه ده تضحي عشانه وتبقي مخلصة له وأنا مخلصة لجمهوري”.

أضافت: “في ناس عرضت عليا الجواز لكن كانوا عايزين يبعدوني عن الفن، لكن أنا فكرت في جمهوري إللي حبني كل السنين دي، طول حياتي بفكر أرضي الجمهور وأبقى عند حسن ظنه”.