هبة العفيفي تكتب: شمال إلى أن تثبت العكس
مبدأ النظريه العموميه لشماليه الانثي (كونها كائن شمال) لحد ما تثبت عكس ده من طهر وعفه وادب واخلاق وايمان وتقوى واحترام وعينين مغمضه ، نظره دونيه في وجهه نظرى تثبت نظريه ان ذكر الجنس البشري ينظر دائما للمراه على انها فريسه لو وقعت تتاكل موقعتش يبقى ادينا اخدنا فكره!
فكره ان محدش بقى جدع ومافيش صاحب يتصاحب وكلام المهرجانات ده للاسف صح بنسبه كبيره وذلك لان مبدأ البنى ادم اللى بتتعرف عليه لاول مره مخونك زى ما انت مخونه بالظبط .
في حاله غريبه بين الناس محدش بيدى الأمان لحد بسرعه.. كل الناس شايفه كل الناس خونه ومصلحجيه ومستفيدين من اي حاجه حتى لو مافيش مصلحه مشتركه للمعرفه ..كله ماشي بمبدأ بكره هيطلب منى حاجه ..بكره هيطلب منى مصلحه..بكره هيبان على حقيقته .
الولاد شايفه البنات كلهم شمال وبالتالى الدخله لازم تبقى شمال فإذا ظبطت يبقى مصلحه اذا لا.. يبقى
البنت كويسه ييجى منها صديقه لحد ما نشوف!
اللى بيتعرف عليكي في الجامعه شايفك شمال
اللى بيتعرف عليكي من عالانترنت شايفك واقعه وشمال
اللى بيتعرف عليكي في الشغل شايفك دكر في صوره انثي
اللى بيتعرف عليكي في فرح شايفك عانس وبايره وجايه تتجوزى
اللى بيتعرف عليكي في النادى شايفك تافهه وفاضيه
اللى بيتعرف عليكي في صالون بيتكوا جاى يعاين ويبص ويقلب يمكن تنفعى.
والحقيقه بتقول ان الطرف التانى زيك بالظبط انتى شيفاه بنفس البصه الشمال لحد ما يثبت العكس وهو مستنيكي تثبتى بردوا العكس !!
الحياه ابسط من كده بكتير ادوا الامان واستنوا شوفوا ماتحكموش بشماليه حد الا لما تعرفوه وتقيموه وده للجنسين على التوازى .
مش معنى انها قالتلك كلمتين حلوين تبقى شمال.
ومش معنى انها قالتلك انها بتحبك قبل ما انت تقولها تبقى شمال.
مش معنى انها بترجع متأخر تبقى شمال.
واللبس مش مقياس انها شمال .
وشطارتها او حتى فشلها في الشغل والتعليم مش عشان هى شمال .
ومفيش حاجه في الدنيا تديك الحق انك تحكم على ست او بنت انها شمال لمجرد انها تاء مربوطه ..
مربوطه في مجتمع شايفها شمال ولازم تقدم اثباتات لتغيير مكانها من الشمال لليمين .
ببساطه هى كمان شيفاك شمال طول مانت شايفها شمال .. افهموها بقى !