أبرز تصريحات الرئيس السيسي عن الاقتصاد وتنمية أفريقيا
شهد الرئيس السيسي الاجتماعات السنوية الـ29 للبنك الأفريقي للتصدير والاستيراد، وتحدث خلالها عن عدة قضايا وأمور تخص قارة أفريقيا وتنميتها وتطويرها.
فيما يلي أبرز تصريحاته:
1- أنا هنا هتكلم من منظور مش بس الاقتصاد اللي أنتوا اتكلمتوا عليه، من منظور الدولة، إزاي الدولة تقدر تعمل ده، ازاي الكلام اللي بيتقال وبنكرره كل سنة واتنين وفي كل مناسبة ومبيتحققش، إيه الفاصل ما بين الواقع اللي إحنا عايزين نغيره وبين الرؤية التي ممكن أن تستشرف الخطوات التنفيذية المناسبة لتحقيقه، في أفريقيا، ومش بس في أفريقيا وفي العالم كله، أنا دايما أقول إن المقارنات والبيانات بتدينا فرصة للتعرف على الحقائق والاستنتاجات والأهداف، مثال عندنا في دول العالم كله بنقول إن فيه أكتر 20 دولة في العالم اللي هما الدول الغنية، دول الـ 20، طيب هو العالم كله كام دولة؟ 200 دولة؟ يعني 20٪ من دول العالم فقط اللي تستطيع من خلال قدراتها الاقتصادية والصناعية ومواردها حتى أنها تتحط في المرتبة دي، طيب بقيت الدول تروح فين؟
2- أنتوا اتكلمتوا على إن كورونا والأزمة الأوكرانية كانت كاشفة وأبرزت تحديات وأزمات لينا بالكامل ممكن نستفيد منها، صحيح، لكن أنا هستفيد من حاجة من دي وأقولكم يا ترى البنية الأساسية في القارة الأفريقية جاهزة إنها تلبي الطموحات والآمال اللي هي شعوبنا بتتمناها لبلادنا؟
3- أنا هديكوا مثال على مصر، لما جينا نتكلم على مصر ونتكلم على تطوير البنية أو إيجاد بنية أساسية مناسبة ليها حتى تنطلق للعمل للأفضل احتاجنا خلال الـ 7 سنين اللي فاتوا دول، وأنا مش مبالغ، بنتكلم في حوالي أنا هقولهم بالدولار، تقريبا حوالي 400 أو 500 مليار دولار، أنا بتكلم على دولة مساحتها مليون متر مربع واللي إحنا عملناه كان على تقريبا فقط 10٪ أو ٪12 منه، طيب القارة الأفريقية اللي فيها 30 مليون كيلو متر مربع وبنتكلم على التكامل اللي أنتوا بتناقشوه، بتقولوا التكامل بين بعضنا البعض، يا ترى البنية الأساسية اللي تقدر تحقق ده للقارة الأفريقية تتكلف كام وهييجوا منين؟ الكلام ده أنا قولته من 5 سنين في ألمانيا وقولت إن إذا كنتم عايزين تغيروا وجه القارة الأفريقية وتخلوها قارة قادرة على أنها تلبي طموحات شعبها وآمال شبابها، أنتوا محتاجين فقط إن أنتوا تعملوا بنية أساسية في القارة دي، إن اتكلمت عن الطاقة الكهربية ما هي بنية أساسية إن اتكلمت عن الطرق والسكك الحديدية ما هي بنية أساسية، إن اتكلمت عن موانئ ومطارات ما هي بنية أساسية، فبكام ومنين ومين يقدر ينفق عليها؟
4- طيب القارة الأفريقية اللي فيها 30 مليون كيلو متر مربع وبنتكلم على التكامل اللي أنتوا بتناقشوه، بتقولوا التكامل بين بعضنا البعض، يا ترى البنية الأساسية اللي تقدر تحقق ده للقارة الأفريقية تتكلف كام وهييجوا منين؟ الكلام ده أنا قولته من 5 سنين في ألمانيا وقولت إن إذا كنتم عايزين تغيروا وجه القارة الأفريقية وتخلوها قارة قادرة على أنها تلبي طموحات شعبها وآمال شبابها، أنتوا محتاجين فقط إن أنتوا تعملوا بنية أساسية في القارة دي، إن اتكلمت عن الطاقة الكهربية ما هي بنية أساسية إن اتكلمت عن الطرق والسكك الحديدية ما هي بنية أساسية، إن اتكلمت عن موانئ ومطارات ما هي بنية أساسية، فبكام ومنين ومين يقدر ينفق عليها؟
5- طيب أنتم كبنوك، أنا كنت بتكلم على البنوك الأوروبية في المرحلة دي، قولت البنوك الأوروبية مستعدة تدي قروض بتكلفة مالية رغم المخاطر العالية في أفريقيا بتكلفة مالية قليلة؟ ده كان كلامي ساعتها وبستدعيه هنا، مستعدين تدوا قروض للدول الأفريقية علشان تعمل بنية أساسية باستثمارات ضخمة وعوايدها هتبان بعد كده، فمحدش، هرجع تاني أقول إن أول تحدي أتصور موجود في القارة الأفريقية هو إيجاد بنية أساسية قارية.
6- وأنا قولت الكلام ده كتير وبكرره قدامكم هنا في وجود المعنيين عن المال والاقتصاد والمعنيين عن الأمل في أفريقيا، حلم الناس في أفريقيا القارة اللي فيها أكبر نمو سكاني وأكبر حجم من الشباب في قارة في العالم بالكامل، إذا كنا بنتكلم على مليار ونص تقريبا ونقول في 2050 هنصل لـ 2 ونص مليار أو أكتر، إحنا دلوقتي مليار و250 مليون نسمة، طيب يا ترى الأحلام بتاعت الشباب دي هتتحقق إزاي وإحنا مش قادرين نروح، مش قادر أروح لأثيوبيا بالقطر، مش قادر أروح لكينيا بالقطر، مش قادر اروحلها بالطريق، مفيش طريق، مفيش سكة حديد، مفيش موانئ تقدر توصلنا ببعضنا، مفيش خطوط طيران تقدر توصلنا ببعضنا، حد يقولي طيب ما نعمله كسياسيين، السياسيين معنيين وهما بينفذوا أي تخطيط على قدرتهم الاقتصادية.
7- في دول في القارة الأفريقية عندها قدرات للزراعة قد كده مرات كثيرة، لكن خد من زمايلنا اللي هنا، يعرف إن أنا علشان أزرع مليون فدان محتاج إن يكون فيه الكهربا بتاعتهم ودي تتكلف أموال ضخمة، محتاج يكون فيه طرق وسكة حديد ودي عايزة أموال ضخمة ثم عايزة تكنولوجيا زراعية حديثة ودي عايزة أموال ضخمة، علشان مليون فدان، مش علشان اتكلم على 25 أو 30 مليون فدان أو أكتر.. في دول جنب مننا، يعني أنا مبحبش أذكر أسماء دول علشان يعني محدش يتألم من حاجة، بنتكلم على أشقاء لينا عندهم 200 مليون فدان قابلين للزراعة، طيب ما إحنا بنتكلم على الموضوع ده بقالنا 50 سنة، ماتزرعوش ليه؟ لأن المطلوب مش موجود ودي القضية، القضية ما بين الواقع اللي موجود وزي ما قلت كده والقدرة على تغييره، علشان تزرع المليون فدان دول بتتكلم في 100 و150 و200 مليار جنيه، يعني 30, 35 مليار دولار، بالمناسبة لأي حد بيسمعني أوعوا تفتكروا إن أنا بقول أرقام، دي أرقام أنا بدير العمل بيها في مصر هنا، يعني الكلام اللي أنا بتكلم عليه ده، ده واقع أنا بعيشه، علشان احول مليون فدان من أرض غير قابلة للزراعة لأرض قابلة للزراعة بتكلم في الأرقام دي، إذن النهاردة القضية مش قضية إن وجود موارد، موارد طبيعية.
8- النهاردة لو أنت حبيت تروح في أي دولة من دولنا الأفريقية علشان تعمل صناعة أولية قيمة مضافة للنحاس، أو قيمة مضافة للحديد فقط أنت عايز الكهربا وعايز المصنع وعايز الطرق والسكة الحديد اللي توصلك للمواني علشان الحاجة دي بعد ما تتصنع وتتحول من مادة خام جاية من الأرض إلى قيمة ممكن مضافة للبلد ثم يتم تصديرها، أموال واستثمارات ضخمة جدا.
9- أول عقبة اتصور موجودة أمام مننا هي توفير التمويل اللازم لبنية أساسية تحقق اللي إحنا بنتكلم فيه، النقطة التانية اللي عايز اتكلم فيها، يا ترى الأمن والاستقرار اللي موجود في دولنا هو يسمح بكده ولا لاء؟ إحنا كنا لسه بنتكلم وبنقول يا ترى المخاطر اللي موجودة في دولنا بتخلي الائتمان تكلفته قد إيه، عالية ولا منخفضة؟ وبالتالي موضوع الأمن والاستقرار، وبالمناسبة العنصرين اللي بتكلم فيهم دول في تقديري الشخصي إن هما الأساس والركيزة الأساسية لأي تغيير مناسب للدول، النهاردة لو محققتش الاستقرار والأمن لا فيه قطاع خاص ممكن يستثمر ولا فيه قطاع أجنبي مستعد ييجي يستثمر في البلد، يستثمر في بلد مش متطمن لها إزاي؟ يستثمر في بلد فيها عدم استقرار إزاي؟ مفيش فيها أمن إزاي؟
10- طيب الاستقرار والأمن علشان يتحقق يا ترى حلم الشعوب وآمالها وقدرة الدولة على تنفيذه، دي مشكلة أخرى، مشكلة أخرى إن الناس عايزة واللي عايزاه قد تكون الدولة غير قادرة على تحقيقه على الأقل في منظور زمني مناسب، فمحتاج زمن، مش محتاج إرادة ومش محتاج خطط، لاء، إزاي النهاردة تحقق الاستقرار والأمن للشعوب اللي هي بتحلم هي وشبابها إن هي تحقق لها آمال ولها طموحات، طيب والآمال والطموحات دي قدرة الدولة على تنفيذها قد إيه؟ أنا قولت الـ 200 دولة فيهم 20 دولة غنية، يعني 10٪، دول اللي ممكن يبقى معاهم، حققوا إزاي بقى مش قضيتي دلوقتي مش هتكلم فيها، لكن أنا بتكلم عن إحنا فين، كام مننا في قارتنا الأفريقية ضمن الـ 20 دولة اللي إحنا بنتكلم عليهم؟.. إحنا بنتكلم على أكتر من 55 دولة أفريقية، كام مننا من الـ 20 دول؟
11- أنا في مصر وإن كنتوا تصدقوني، إن كنتوا تصدقوني، وأنا بحلم برضو لأفريقيا والله، أنا بحلف، بحلم لأفريقيا لأنهم ناس، من حق الناس تعيش، والناس دي تكبر وتحقق أحلامها وأحلام شبابها وتعيش في مكان تاني غير المكان اللي إحنا موجودين فيه دلوقتي، أنا بحلم برضو لأفريقيا، وبقوله يارب والله والله والله لو أعطتني ما هسيب دولة إلا أما أساعدها، والله والله تاني لو أعطتني ما هسيب دولة إلا أما أساعدها، لأن أفريقيا لن تعبر ما هي فيه إلا إن إحنا نكون كلنا قلوبنا على قلب بعض ونتجاوز أي خلافات أو مشاكل من أجل مستقبل نغير فيه الواقع اللي إحنا عايشين فيه لمستقبل أفضل.