تامر حسني عن فيلم "بحبك": ربنا كرمني بإيراد عمري ما عملته

هدير عبد الوهاب

تحدث الفنان تامر حسني، عن تحضيرات وكواليس فيلمه الجديد “بحبك”، لافتا إلى أنه أصر على تقديم فيلم رومانسي رغم معارضة المنتجين لهذه النوعية لإن التوجه العام للسينما خلال الفترة الماضية كان للأفلام الأكشن والعنف فقط .

أضاف “حسني” خلال مداخلة هاتفية مساء الأحد في برنامج “كلاكيت” الذي تقدمه لينا الطهطاوي على راديو “نجوم إف إم”، أنه كان يستعد للفيلم منذ عامين والتحضيرات أخذت منه وقت كبير، موضحا “أنا ربنا كرمني بإيراد أنا عمري ما عملته في الأيام القليلة دي ومكنتش متخيل إن أنا هعمل كدة لإني كنت متوجه إن ده فيلم رومانسي والناس عايزة نوعية تانية، وأنا دخلت عشان أحارب، ولازم يبقى فيه مشاعر ولازم الناس تفكر بحب وعواطف ويبقى فيه حاجات تانية بنتكلم فيها مش كله قتل وضرب ودم والحمدلله طلعت أنا الصح”.

نرشح لك :كلمات أغنية “حبيتها يا ناس” لـ تامر حسني من فيلم “بحبك”

وعن رأيه في حب العمر، قال إن من وجه نظره أن بعض الناس تتوهم أن الحب الأول هو حب العمر “ولكن ممكن يجي حب بعد كدة يدفن الحب الأولاني بالحيا”.

وعن نجاح الفيلم، قال إنه يجتهد باستمرار ويتجنب القيل والقال، كما أنه يدرس بشدة كل مجال يقرر الدخول فيه، مشيرا إلى أنه لا يشغله سوى عمله وأسرته حول العمل والأسرة فقط حتى أثناء التسجيل في الاستوديو يشارك أولاده وزوجته يشاركونه ويستشيرهم ويدعموه.

أردف أن ردود أفعال الجمهور والتأثر به جاء من تشوق الجمهور للأعمال الرومانسية التي اختفت منذ فترة، موضحا “أنا قيستها بصراحة على الأغاني يعني وأنا بتكلم مع المنتجين وهما بيقولولي لأ قولتلهم طب أنا لما عملت أغنية (ناسيني ليه) و(كفياك أعذار) محدش سمعهم مثلا”.

تابع “أنا حتى الفيلم ده كنت المؤلف بتاعه والمخرج وعامل الموسيقى التصويرية، فحاسس إنه إبني وأنا مسؤول من كل الاتجاهات فيه وهي تجربة مش لازم أعمل كده تاني بس الله أعلم أنا هعمل كدة تاني أو لأ، حبيت أعمل كدة وابقى مسئول عنه لأن أنا حاسس بمشاعر كتير أوي نفسي أوصلها للناس، في حاجات كتيرة أوي محدش بقى يتكلم فيها أبدا وأعتقد ده بيثبت إن الناس فعلا محتاجة المشاعر والعواطف دي، عشان كدة الفيلم لمس الناس والحمدلله”، مضيفا “النهاردة صحيت على خبر جميل إن أمريكا وكندا بيمدوا عرض الفيلم كمان أسبوع ودي حاجة مهمة”.

أضاف أن إحساسه بالنجاح وتفاعل الجمهور مع المشاهد يختلف وهو مخرج ومؤلف عن وهو ممثل فقط، موضحا أنه عندما كان في مرحلة كتابة الفيلم، كان يعلم مسبقا ردود أفعال الجمهور على كل مشهد بسبب خبرته، لافتا إلى أنه أخبر الفنانة هنا الزاهد أن الناس ستتأثر بهذه المشاهد.

تابع “يعني حتى وأنا بكتبه كنت بقولها انتي هتسمعي التعليق ده في الوقت ده وكل حاجة كتبتها وقولت لها كانت بتعمل كده في السينما”. لافتا “هي لوحة مكتملة الناس سقفت لها كلها ومبسوط عشان ده كان حلم من سنتين والحمدلله رد الفعل والتسقيف ده كرم ربنا والهدية الجميلة إللي بعد التعب ده كله بتهون عليا وفعلا ربنا بيكرم على قد المجهود، ونفس ردود الأفعال دي أنا شايفها في أمريكا وكندا وكل الوطن العربي”.

&;