بعد تصريحات شيرين.. بيان من أسرة الراحل حسن أبو السعود

أصدرت أسرة الموسيقار الراحل حسن أبو السعود ، بيانا ترد فيه على تصريح شيرين عبد الوهاب الذي ذكرت خلاله اسم والدهم.

جاء البيان كالتالي: “في ميزان الإنسانية إيه قيمة الموهبة إذا اقترنت بالإساءة والأذى؟

نرشح لك: شيرين عبد الوهاب: كنت بجمل صورة حسام حبيب علشان أرتاح منه

التنمر والسخرية من الناس عيب، بس العار الحقيقي التنمر والسخرية من شخص ميت – ومش هقول شخص واكلين معاه عيش وملح وله فضل علينا.. لأن قليل الأصل ممكن يتناسى وينكر ده عادي، لأن الإساءة لشخص ميت مستوى أكثر انحداراً من الشر والدناءة.

وقت الحساب المسيء هيقول لربنا إيه، هيقوله لأ متحاسبنيش إني بتريق على ميت وبجرحه وبجرح محبيه وأسرته، أصل أنا موهوب أو مشهور أو غني؟ لأ متحاسبنيش أصل أنا أحسن فنان في الكون؟

للأسف المسيء في ابتلاء شديد، مش فاهم أنه عمال يحفر ويوسع في الحفرة لنفسه.

للأسف الشر زايد وقلة الأصل زايدة وقلة الأدب مسكوت عنها، وكمان الأفاقين ماسكين راية دفاع مستديم عن الظلم والإيذاء.

ميزان وبيتملي، ربنا يجعل وجع قلبي ودعائي الليلة دي وليالي قبلها بسبب الإساءة المتكررة والحقد الظاهر في الطاقة والكلام من نصيب أي وكل مُسيء.

كلمة أخيرة، حسن أبو السعود الله يرحمه شكلاً كان قمر وشخصيةً كان دمه سكر وطيب وكريم ومتواضع ومثقف وبيتكلم 3 لغات أجنبية بطلاقة ولبق وذوق.

، فمش ممكن هتكوني شبهه في يوم من الأيام”.

يذكر أن شيرين عبد الوهاب كانت قد قالت خلال مداخلة هاتفية مع برنامج”كلمة أخيرة” المذاع على شاشة ON وتقدمه الإعلامية لميس الحديدي: “أنا لو كنت أدمنت الأدوية مع إن مفيش الكلام ده ودكتوري موجود.. بس لو كنت أدمنت الأدوية وتخنت ده علشان عيشته علشان حياتي معاه، أنا كنت زي البدر لما عاشرت حسام حبيب بقيت شبه حسن أبو السعود”.