محمد إمام: الجمهور هو اللي رباني وصرف عليا!
رد محمد إمام على الأحاديث التي تقول بأن يعتمد في أعماله على “التيمة الجماهيرية”، أكثر من تقديم عمل تمثيلي قوي، موضحا أنه يهتم طوال عمره بالأعمال الجماهيرية وما سيعجب الناس.
أضاف “إمام” في لقاء مع قناة “سكاي نيوز عربية“: “طول عمري بفكر في الأعمال الجماهيرية، ما إحنا الفن بنعمله للناس، إيه بيعجب الناس إيه ممكن يبقى جماهيري هو دا اللي بيبقى في دماغي أكتر”.
نرشح لك: محمد إمام يشوق جمهوره لفيلمه الجديد: هيبقى معايا نجم كبير جدا
ذكر أنه يعمتد في طريقة تقديمه لكل عمل على طبيعة الدور والشخصية، مشيرا إلى أنه يحاول التنويع فيما يقدمه قدر الإمكان لكنه يحاول تقديم مشروع خاص به وهو كوميديا الأكشن، مردفا: “وبحاول أنوع على قد ما أقدر، لكن في سكة ماشي فيها دلوقتي هي الأكشن الكوميدي وحابب أثبت السكة دي”.
أشار إلى أنه عندما يريد تقديم عمل ما يفكر أولا فيما يريده الجمهور، رغم حبه للتنوع وتقديم أعمال مختلفة، مضيفا: “الجمهور أهم حاجة، هو دا اللي بيصرف علينا، عايز أقول الشعب المصري والعربي هو اللي صرف عليا ورباني، ودخلني مدرسة وهو اللي دخلني جامعة، من التذاكر اللي كان بيروح يدفعها لأبويا في السينمات والحاجات دي، والموضوع دا واخده من أبويا، والموضوع دا واخده من أبويا أكتر أن أهم حاجة هي الجمهور، وأنا عايز أقدم إيه لازم الواحد يعمل قاعدة جماهيرية يكون الجمهور واثق فيه وساعتها ممكن يغير براحته”.
لفت محمد إمام إلى أنه يرغب حاليا في تقديم عمل مختلف عما قدمه، إذ يرغب في تقديم عمل تراجيدي فقط أو كوميدي فقط لكنه لا يزال محتارا في ذلك، وعن دوره في مسلسل “الاختيار” قال إنه كان من أقوى ردود الأفعال التي حصل عليها، إذ أن المخرج بيتر ميمي أصبح واحد من أقوى المخرجين في مصر ويتمنى العمل معه، مشيرا إلى أنه سيجمعهما مشروع فني قريب.
أوضح أنه يعمل حاليا على فيلم خاص به، ومن ثم سيعمل مع والده في فيلم كان قد أٌعلن عنه، وعن تعاونه مع والده ورأيه الفني فيه، ذكر: “أكتر واحد برتاح معاه في الشغل هو عادل إمام، وأول مرة مثلت معاه كنت قلقان جدا لحد ما دخلت عليه اللوكيشن حسيت كأني داخل عليه أوضة النوم، فحسيت الموضوع كان مريح جدا، وأتمنى نعمل الفيلم اللي بنجهزله سوا. أي حد هيشتغل مع عادل إمام هيبقى فيلم عادل إمام لأنه ظاهرة محصلتش، ودا عملي مشكلة بصراحة لأن في الأول أنه ابن عادل إمام بيمثل دي كانت مشكلة فكان لازم أثبت نفسي، وأنا كمان حابب موضوع التمثيل قوي وبجتهد على قد ما أقدر وباخد الموضوع على صدري، أنا حياتي مفيهاش غير بيتي وشغلي ويمكن شغلي واخدد وقت أكبر، لكن عادل إمام ربنا يحفظه هو ظاهرة مش هيجي زيها خالص”.
يذكر أن آخر أعمال محمد إمام، فيلم “عمهم” يعرض الآن في السينمات، وهو من تأليف وسام صبري، وإخراج حسين المنباوي، وإنتاج أحمد السبكي، وبطولة محمد إمام، وسيد رجب، ومحمد سلام،ومحمد لطفي، وهدى المفتي، وأيتن عامر، وباسم سمرة، ورياض الخولي، وأحمد خالد صالح، ومحمد ثروت، والشحات مبروك.
