عمرو أديب: الأهلي محتاج فريق جديد!
علق الإعلامي عمرو أديب على مباراة الأهلي والزمالك، وتتويج الزمالك بطلا لكأس مصر على حساب الأهلي.
قال “أديب” خلال برنامج “الحكاية”، المذاع عبر شاشة “mbc مصر”: “الزمالك فاز بالأمس لأنه عنده لعيبة موهوبة وشابة وعبقرية، وكان ممكن الزمالك يخلص الشوط الأول 4 أو 5 وهو مستريح.. لأن النادي الأهلي في الشوط الأول كان مستسلم وتعبان، الشناوي إمبارح كان عنده كوابيس من اللي بيحصل، وخط الدفاع ولا مرة هاجمناه غير وعدينا منه”.
نرشح لك: تعليق عمرو أديب على انتقاد ميدو لنقابة الأطباء
أضاف: “أنا قولت قبل كده.. الأهلي مش عاوز مدرب جديد لأ الأهلي عاوز فريق جديد، لكن لاعيبة الزمالك بتعرف تسلم وتستلم ومهاراتها الرئيسية كلها عبقرية، وكانو بياخدو لاعيبة الأهلي يفرجوهم على الهرم وبعدها يودوهم المعادي ويرجعوا.. كنا بنتفرج على فرقة بتقود بكل فنون الكرة الحديثة”.
أردف: “لما لقيت الحكم إدى 7 دقايق وقت بدل ضايع، قولت أيوه هما دول الـ7 دقايق المشهورين بقى.. وقولت يا حنان يا منان وكل الدعاء اللي أعرفه، لحد لما الحكم صفر، حسيت إن الدعامة اتحركت من مكانها في قلبي، وبعت جبت شوية فراخ أكل فيها وبعدها زبادي بالعسل والقشطة وعصير برتقال.. ونمت زي الطفل”.
كانت مباراة الأهلي والزمالك في نهائي كأس مصر التي أٌقيمت باستاد القاهرة الدولي، انتهت بتقدم الزمالك بهدفين مقابل هدف. ليحقق الزمالك لقبه الـ28 لكأس مصر.
أحرز الهدف أحمد سيد زيزو بعد خطأ من محمد الشناوي حارس مرمى النادي الأهلي، حيث ترك مرماه وتقدم ليستغل زيزو الخطأ لصالح ناديه. بينما أحرز إمام عاشور الهدف الثاني.
بينما أحرز حسام حسن الهدف الأول للنادي الأهلي في الشوط الثاني من عمر المباراة.