أمير طعيمة يستنكر مضايقة المرأة المحجبة
شروق عبد الحميد
أعرب الشاعر أمير طعيمة، عن غضبه من تدخل البعض في مسألة حجاب المرأة، موجها رسالة لمن يعارضون الحجاب.
كتب “طعيمة” عبر حسابه الرسمي على موقع التواصل الاجتماعي”فيسبوك“: “هو موضوع فلانة لبست الحجاب وفلانة خلعته ده شاغل الناس ليه، إيه مشكلة البعض مع الحجاب أساسا؟! وبعض الإعلاميين ومن يطلق عليهم العلمانيين بيستقتلوا ليه عشان نفي فرضية الحجاب، يعني لو المحجبة اقتنعت بفتاويك وقلعت الحجاب الكون والكوكب والبلد هيستفيدوا إيه؟
نرشح لك: شروط حضور تصوير حلقة روبي في “معكم منى الشاذلي”
أشار إلى أن غير المحجبة غير معرضة للإضطهاد على عكس المرأة المحجبة، مردفا: “هل إحنا مثلا دولة بتفرض لبس الحجاب على المرأة فأنت ضد قهرها؟ لا، هل إحنا بنضيق على غير المحجبة مثلا في الوظائف والحياة العامة فأنت ضد ظلمها؟ لا، بل بالعكس دي غير المحجبة هي اللي فيه تضييق عليها في الفن والإعلام وبعض الوظائف، ده حتى فيه أماكن ومطاعم بتمنع دخول المحجبات”.
تابع: “يبقى السؤال: الست المحجبة دي مضايقاك في إيه وقارفها في عيشتها بكلامك ليه، وعمال تجيبلي صور قديمة وتقارنها بصور جديدة كما لو كان ده دليل إننا كنا متحضرين وبقينا متخلفين، معلش هو مال التحضر بالحجاب والفستان المفتوح والميكرو جيب مش فاهم، يعني المحجبة لو لبست اللي بيبسطك معدل ذكائها وإنتاجيتها هيرتفعوا فالبلد هتروح في حتة تانية؟”.
استطرد: “بعدين تعالى نفترض أننا صحينا من النوم لقينا البلد كلها مفهاش محجبة واحدة زي ما بتتمنوا.. ها؟ طلعنا القمر كده؟ بقينا في مقدمة الدول تعليميا؟ معدل النمو هيزيد؟ هنغزو العالم والجنيه هيبقى بألف دولار؟”.
واختتم حديثه بتوجيه رسالة لمن يطالب بخلع الحجاب: “يا عم يا اللي شايف الإلحاد ظاهرة صحية ودعوة للتفكير والشذوذ حرية شخصية، ممكن تتواضع وتعامل المحجبة نفس المعاملة وتعتبرها حرة في اختيار لبسها وتكبر دماغك وتشوف وراك إيه وتعمله، ولا أنت اللي معطلك ومخليك خيبان كده أن فيه ستات محجبات حاجبين عنك أحلامك وأهدافك العظيمة”.
