نيللي كريم: الست لازم تعتمد على نفسها حتى لو جوزها ملياردير

كشفت الفنانة نيللي كريم عن زواجها 3 مرات، موضحة ما تعلمته من تلك التجارب، وموجهة نصيحتها للفتيات.

قالت “كريم” خلال لقائها مع الإعلامي أنس بوخش في برنامج “ABtalks” الذي يعرض على موقع يوتيوب: “اتعلمت من الجواز الأول والتاني إن الست لازم تعتمد على نفسها 100% حتى لو كانت متجوزة 10 مرات، وجوزها كان ملياردير وعنده 100 طيارة”.

نرشح لك: هشام عاشور يجسد دور زوج نيللي كريم في مسلسل “روز وليلى”

تابعت: “لازم يكون عند الست حاجة بتحبها زي الشغل.. محدش بيبقى مسئول عن سعادة حد لما البني آدم يكون مستقل وعارف هو عايز إيه هيعرف يبص للأمور بعين مختلفة.. أنتي مش قاعدة في الجوازة ومستحمله عشان الشخص اللي معاكي مرتاح ماديا وبيصرف عليكي أو قاعدة في الجوازة عشان خاطر تربي الولاد”.

استكملت: “عشان كده لما تحسي إنك مضطهدة نفسيا في علاقة أو جوازة أنتي مش عايزاها لازم تبقي قوية ومعتمدة على نفسك.. ده اللي أتعلمته.. سمعت مقولة مضمونها (اختار شخص ما تقدرش تعيش من غيره، مش تقدر تعيش معه).. الاستقلالية مهمه نفسيا للست، وفي ناس بتفهم معنى القوة اللي بتديها الاستقلالية للست غلط وبيقولوا إنها عايزة تتحكم وده غلط جدا”.

واصلت: “الحياة اللي بيبقى فيها تنازلت دايما الست هتيجي بعد فترة وتقول لجوزها ده أنت اللي خلتني أبطل كذا وكان زماني دلوقتي كذا، وهنا هيبدأ الطرفين يلوموا بعض، والشخص مش هيرتاح لحد بيحبه إلا لو كان إنسان متحقق من جواه ومعندوش نقص يطلع على غيره فالاستقلالية مهمة أوي هنا عشان هي اللي بتعرف الإنسان هو مين بظبط وعايز ايه من حياته وإزاي يستمتع بيها مع نفسه”.

اختتمت: “أنا شايفة إن الاستقلالية دي حاجة جميلة خصوصا للبنت.. بعد الدراسة البنت لازم تحاول تلاقي شغل كويس ويبقى عندها مرتب عشان متطلبش حاجة من حد وتقدر تجيب كل اللي هي عايزاه، وأنا مع إن الولاد من سن 14 سنة ينزلوا يشتغلوا في الصيف لو 4 ساعات في اليوم عشان يعرفوا تمن القرش ويبقى معاهم الفلوس بتاعتهم هم يصرفوها في اللي بيحبوه بدل ما هم قاعدين اليوم كله على الإنترنت”.