شيلت وداني كلها.. نيللي كريم تروي تفاصيل استئصال ورم من وجهها
شدوى ممدوح نيللي كريم
كشفت الفنانة نيللي كريم أنها كانت تعاني من ورم بحجم البيضة في وجهها، وقد سافرت إلى أمريكا لإجراء عملية الاستئصال هناك.
قالت “كريم” خلال لقائها مع الإعلامي أنس بوخش في برنامج “ABtalks” الذي يعرض على موقع يوتيوب: “سافرت أمريكا عشان أعمل عملية لأن كان عندي ورم بحجم البيضة في الغدة النكفية في الوش وكان قريب أوي من الأعصاب.. أنا اكتشفت الورم ده بالصدفة لما حطيت إيدي تحت وداني ولقيت حاجة زي الكورة فافتكرتها حباية وقتها بس الحمدلله الورم طلع حميد وشيلته“.
نرشح لك: نيللي كريم: لو مكنتش بحب الاستقرار مكنتش هخلف 4 عيال
أضافت: “قبل ما أسافر أمريكا روحت لدكاترة في مصر ولندن وكلهم قالولي إني بعد العملية ممكن مقدرش أحرك وشي لمدة سنة، كنت بدور على دكاترة لحد ما لقيت دكتور صيني متخصص في أمريكا“.
تابعت: “العملية كانت المفروض تعملي علامة كبيرة في وشي وقولت للدكتور وقتها لو في أي حاجة ممكن تتعمل في العلامة دي عشان أنا بمثل ووريلته الإنستجرام بتاعي وكان مبسوط بيا ونسق مع دكتور تجميل وسأله هو يقدر يعملي ايه عشان الخياطة متبقاش باينة في الوش، وقالي إن في طريقة معينة هيعملي بيها العملية وهي إنه يشيل ودني كلها“.
أردفت: “وأنا رايحة العملية كنت بفكر في إني مش هقدر أحرك وشي تاني، وكنت بفكر معملهاش أصلا بس رجعت في كلامي وقولت اللي يحصل يحصل بقى، ولما فوقت من العملية خلوني أحرك وشي وحركته فعلا وكنت حاسة بكل حاجة“.