چيلان علاء: أتمنى تجسيد قصة حياة مريم فخر الدين

شدوى ممدوح

قالت الفنانة چيلان علاء إنها تفضل أن يُطلق عليها لقب ممثلة بدلا من مذيعة.

أضافت “علاء“ خلال لقائها مع برنامج “أسألني“، المذاع عبر قناة “cbc“، أن أكثر المذيعات التي تفضل مشاهدتهن هن الإعلامية منى الشاذلي، وإسعاد يونس، وهالة سرحان، مشيرة إلى أنها لو كانت مقدمة برامج لكان أول ضيوفها سيكون الموسيقار عمر خيرت، لافتة: “أنا بحب عمر خيرت وهو مطلعش كتير في برامج قبل كده وحاسه إن ممكن نعمل مع بعض حلقة مختلفة“.

نرشح لك: مهرجان القاهرة يمنح كاملة أبو ذكري جائزة فاتن حمامة

تابعت: “المذيعة الشاطرة لازم تكون مثقفة جدا وبتتطور باستمرار ولازم تكون لذيذة وإيجابية ومبتسمة على طول، وأنا كنت في كلية إعلام تخصص إذاعة وتلفزيون وبابا مكنش موافق أدخل مجال التمثيل ولما وافق كنت خلصت جامعة خلاص“.

وعن تخرجها من مدارس راهبات قالت: “مدارس الراهبات بتختلف عن المدارس العادية في إنهم بيبقوا شداد أكتر لدرجة كنت بحس إني في معسكر مش في مدرسة بس استفدت منها كتير أوي فطلعت بحافظ على مواعيدي وبلتزم بيها وبركز في كل حاجة كويس“.

بالنسبة لرفض والدها دخولها لمجال التمثيل في البداية، لفتت “علاء“: “بابا كان خايف عليا بالذات إني معنديش أي حد في الوسط الفني فكان اللي بيسمعه زي كل اللي بيسمعه كل الناس وبيخافوا منه وأقعدت كتير أوي عشان أقنعه لحد ما دخلت برنامج أبو حفيظة ولما شاف تمثيلي اتبسط أوي“.

أضافت: “أول اسم اتنديت بيه في الشارع هو اسم المذيعة ريهام سعيد عشان دي أول واحدة أقلدها في برنامج أبو حفيظة، وماكنش في أي ارتجال في البرنامج وأنا وأكرم كان في بينا كيميا كويسة”.

كما أشادت “علاء“ بالفنان أكرم حسني، لافتة أنه يتمتع بخفة دم وكان يتقبل جميع أفكار طاقم العمل خلال تقديم برنامج “أبو حفيظة “، مضيفة: “أكرم نصحني نصيحة واخدها من على لسان الفنان أحمد حلمي وكانت إن أحلى حاجة في النجاح إنك متحسش بيه فكان ديما بيقولنا لو حسيتوا بنجاحكوا أوي هتقعوا“.

أردفت: “الاعتماد في الكوميديا مش لازم يكون على الشكل الوحش والمثال على كده الفنانة ياسمين عبد العزيز هي زي القمر وبتقدم محتوى كوميدي لذيذ، وزي كمان الفنانة دنيا سمير غانم، وأنا نفسي أكون بنت شكلها لذيذ شبه الناس ودمي خفيف وبيحبوني، وأي ممثل ممكن يعمل أي دور لأن احنا جوانا كل المشاعر“.

أكملت: “بيهمني عدد المتابعين على الإنستجرام لأنه وحدة قياس كل ما بيزيد كل ما بطمن إن الناس حباني ولو حصل أي خلل في العدد بحس إن عندي مشكلة، وأكتر حد يحب أتابعه وبيضحكني على السوشيال ميديا هو محمود السيسي“.

لفتت “علاء“ أنها تتمنى تقديم سيرة حياة الفنانة مريم فخر الدين، وذلك بسبب تشبيه البعض بينهما، مضيفة أنها تتمنى العمل مع الفنان كريم عبد العزيز، ولا تحب أن تكون جزءا من الإفيهات الجريئة.