أبرزها رأيها في الساحل.. 6 تصريحات لـ أسما شريف منير

أجابت خبيرة التجميل أسما شريف منير، على العديد من الأسئلة التي وجهها لها الجمهور عبر حسابها الشخصي على موقع “إنستجرام”.

تضمنت الأجوبة على العديد من التفاصيل المتعلقة بحياتها الشخصية.

وجاءت الإجابات كالآتي:

1- أنا مليش في الساحل بسبب الناس لكن الساحل نفسه جامد والبحر فظيع والأماكن لذيذة بس رتم الساحل نفسه دمه تقيل والناس اللي في الساحل عايزين قفا، لكن غير كده بحب الساحل أوي.. إسكندرية دي حاجة تانية خالص، هي ذكرياتي وكل طفولتي بحبها أوي وليها إحساس خاص بالنسبالي، ومفيش مقارنة بينهم بس إسكندرية بحبها بناسها.

2- لما بطلت أسمع للناس اللي بتخليني ماشية جنب الحيط بشكل مبالغ فيه، ولما قررت إن أنا أهتم بنفسي واكتشفها وابتديت أسعى أفهم نفسي وأعمل حاجات كانت متأجلة وأتعرف على ناس جديدة ومقعدش في البيت طول الوقت، في حاجات كتير غيرت حياتي الفترة اللي فاتت رغم إن كان في ناس كتير ضد ده.. متسمعوش للناس اعملوا اللي شايفينه صح طالما مبتجوش على حد.

3- أنا كان نفسي أجيب طفل واحد واهتم بيه، بس بنتي نفسها أوي يكون عندها أخ أو أخت ونفسها جدا يبقى معاها حد لأنها أوقات بتبقى زهقانة، فلو رجعت بالزمن كنت جبت طفل تاني وأنا شايفة دلوقتي إن طفلين أحسن حاجة يكبروا مع بعض في الدنيا.

4- اختفيت الفترة اللي فاتت عشان عايزة أرجع بمحتوى ليه معنى ليا وليكوا، مش عايزة أفضل أعيد نفسي وأقول نفس الكلام وكمان عشان أنا مشغولة دلوقتي في ورشة التمثيل اللي باخدها مدياها كل طاقتي لأنها من أهم المحطات اللي في حياتي دلوقتي.

5- صبغت شعري أورانج عشان أنا بعشق التغيير وعملت شعري كل الألوان اللي في الدنيا، بحب أغير في شكلي طول الوقت وكل ما بعدي بمرحلة مهمة في حياتي ببقى عايزة أغير لون شعري عشان لما برجع للمرحلة دي ببقى عايزة افتكر ايه اللي كان بيحصل، حتى تلاقوا الست بعد كل مرحلة مهمة في حياتها بتغير لون شعرها فأنا عملت كده، وهي فترة كده في الحياة وهتلاقوني غيرته تاني.

6- بصدق فعلا في الحسد لأنه مكتوب في القرآن وفي السنة المفروض إننا نداري على حياتنا.

نرشح لك: أسما شريف منير: “لو اتجوزت حد شبه بابي هنولع في بعض”