أبرزها عن نجلها وزواجها من عماد حمدي.. 13 تصريحا لـ نادية الجندي
حلت الفنانة نادية الجندي، ضيفة على برنامج “تفاعلكم“، الذي تقدمه الإعلامية سارة دندراوي، عبر شاشة العربية.
وخلال الحلقة، أجابت “الجندي” على العديد 25 سؤالا عن مشوارها الفني وحياتها الشخصية.
نرشح لك: غادة رجب: كرست حياتي لـ ابنتي
وفيما يلي نستعرض أبرز إجاباتها:
1- كل اللي قدمتهم للفن بحس إني فخورة بيهم لأن كلهم أثبتوا إنهم على قدر كبير من الموهبة والالتزام والفن.. أحمد زكي، محمود حميدة ، والمفاجأة الكبرى العملاق ياسر جلال اللي تميز السنادي بشكل مذهل للناس، كل دول بحس إن أنا فخورة إني قدمت ناس كانت رؤيتي عنهم صائبة.
2- ممكن أفكر في الزواج، لو صادفني حب وراجل محترم ويقدر عملي ايه اللي يمنع يعني؟!
3- نادية الجندي فقط هي نجمة الجماهير.
4- إيرادات أفلامي أثبت إني من أهم 3 نجمات سواء في السينما أو في التلفزيون، الأعمال اللي حقتت أكبر مشاهدة، وتواجدي لغاية دلوقتي على الساحة هو أكبر دليل.
5- سر رشاقتي هو إصراري على إني أحترم عملي وأحترم جمهوري، لأن الفنان التزام، لازم يبقى قدوة شكلا وموضوعا وسلوكا.
6- عماد حمدي رجل عظيم وفنان قدير، وأنا كنت صغيرة أوي لا أتخطى الـ 15 سنة وهو كان داخل على الـ 60، وطبعا كان حدث في الوسط الفني إزاي لسة تلميدة في المدرسة وفي السن ده تتجوز رجل أكبر منها بكل الفرق ده!، لكن يكفي إنه هو أبو ابني واداني أهم شيء في حياتي “هشام”.
7- ابني اسمه “هشام” مسموش “نادر” زي ما بيطلعوا في الصحافة ويكدبوا وبيطلعوا صور لواحد تاني ابن عماد حمدي من مراته القديمة، لكن ابني اسمه هشام.. مينفعش ينسبوا ليا واحد مش ابني، حتى ابني الحقيقي يزعل، لكن هو مبيزعلش عشان عارف إن دي وشاية من بعض الناس اللي بتحاول تشوشر على أي صورة حلوة وبيقولوا أكاذيب.
8- أنا مش بخبي ابني من الإعلام بس هو بعيد عن الوسط الفني، له حياته الخاصة، أخبيه ليه! ولد جميل وأخلاق مفيهوش ديفو عشان أخبيه.
9- أنا ضد فكرة إعادة الأعمال اللي سابت بصمة كبيرة، مهما كانت التقليد مبيطلعش زي الأصل، الناس مبتحبش التكرار.
10– عمر أعمالي ما كان فيها جنس مبتذل.. لما يبقى في مشاهد محدودة جدا من خلال سياق العمل الدرامي، بعملها بس بأسلوب غير مبتذل، بوصل المعلومة للناس بطريقة فيها شياكة، أنا أعمالي كلها هادفة وفيها رسايل وعايشة لحد دلوقتي.
11- مفيش حاجة بتزعجني لأني واقفة على أرض صلبة، كل دور ليا مختلف عن التاني أنا قدمت كل الأنماط اللي في الدنيا، اللي قالقلني في حياتي إني مش لاقية حاجة أقدمها، لكن برضه بفضل أبحث عن الشخصية المختلفة.
12- كل أدواري قريبة لقلبي، لأن أنا معملتش عمل إلا وأنا واثقة منه تماما ودارساه كويس أوي وحباه أوي وعايشة الشخصية أوي وعشان كده ردود أفعال الناس لكل أعمالي حسسني إن اختياراتي كانت صح والدقة في العمل وصلتني للي أنا فيه كل أعمالي بحبها الحمد لله.
13- سر جمالي هو إن إيماني بالله كبير أوي، وإخلاصي لربنا وعملي وحب الجمهور كل دي حاجات بتديني طاقة إيجابية وتحدي وإصرار إني أبقى عند حسن ظن الجمهور.. تقاطيع وشي من أول ما بدأت هي هي متغيرتش، لكن ممكن حقن بوتوكس وفيلر وفيتامينات، لازم لأن أولا البشرة بترهق أوي من التصوير، التصوير مهلك والإضاءة أكبر خطر على البشرة والتلوث البيئي بيبوظ البشرة فلازم تعتني بوشك، مابالك بقى اللي قدام الكاميرا ساعات المكياج بيقعد على وشي لما بكون بصور أكتر من 20 ساعة.