هشام ماجد: دنيا سمير غانم أقوى ممثلات جيلها
قال الفنان هشام ماجد، إنه يعتبر الفنانة دنيا سمير غانم أقوى الممثلات في جيلها، لموهبتها التمثيلية والغنائية المميزة، وإلتزامها الشديد في عملها.
تابع خلال لقائه مع الإعلامية إنچي علي في برنامج “أسرار النجوم” عبر إذاعة “نجوم إف إم: “أنا بشوف إن دنيا سمير غانم أقوى ممثلات جيلها، هي معجونة تمثيل وعفريتة بصراحة، من أكتر الناس اللي بمثل قدامهم وبقول هي بتعمل كده إزاي؟ بتبقى قاعدة معانا بطريقة ولما بتدخل في الشخصية بتتحول، وملتزمة جدا وبتحب تذاكر كتير، ومعندهاش الإيجو بتاع النجوم، ولطيفة وكل الناس بتحبها، وأنا بستمتع جدا لما بشتغل معاها”.
نرشح لك: حمدي الميرغني: المسرح زي الچيم للممثل
أضاف أنه بعد عرض فيلم “تسليم أهالي”، أخبرها أنه استمتع بالعمل معها بشكل كبير، وأنه يراها من أحق الممثلات لبطولة فيلم استعراضي كبير.
وعن تعاونه مع الفنانة الراحلة دلال عبد العزيز في فيلم “قلب أمه” و”تسليم أهالي”، علق: “دلال عبد العزيز بعيدا عن التمثيل، كانت من أكتر الناس اللي كانت بتروح تزور ناس وتسأل عليهم حتى الممثلين اللي كانوا موجودين زمان ودلوقت عيانين ومش بيشتغلوا كانت دايما بتودهم وتزورهم، وده مش سهل لأن كلنا فينا خير بس مش كلنا عندنا وقت نعمل ده، هي كانت ست عظيمة وشاطرة جدا وحنينة وبتملى اللوكيشن كله بهجة”.
يشار إلى أن فيلم “تسليم أهالي” من تأليف شريف نجيب وإخراج خالد الحلفاوي، ويضم العديد من النجوم ومنهم: دنيا سمير غانم، هشام ماجد، شيكو، محمد ممدوح، ودلال عبد العزيز، ولوسي، وعمرو وهبة، وبيومي فؤاد.