أمينة شلباية: ابتعدت عن برامج التلفزيون بسبب فقرات الإعلانات

سالي فراج                                            أمينة شلباية

قالت أمينة شلباية، خبيرة التجميل، إنها ابتعدت عن تقديم البرامج على شاشة التلفزيون في شهر ديسمبر، مشيرة إلى أنها كانت تقدم برامج غير راضية عنها.

أضافت “شلباية” خلال لقائها ببرنامج “Gossips” على يوتيوب: “قبل ما أوقف تليفزيون كنت بقالي سنتين في دايرة من منتج لمنتج بعمل برامج أنا مش راضية عنها، البرنامج يبدأ حلو، بعد كده إعلان منتجات لا أنا راضية عن المنتجات ولا راضية عن البرنامج، أغير المنتج فيبدأ حلقتين تلاتة من الدقيقة 1 للدقيقة 60 بعمل إنترفيو من دكتور دافع فلوس لكريم أنا مش راضية عنه”.

نرشح لك: ليس مفخرة.. رد محمد أبو بكر على تصريحات رضوى الشربيني حول الطلاق

أشارت إلى أنها أهم شيء عندها ثقة السيدات بها، موضحة أنها شعرت بتأنيب ضميرها، وظلت تلوم نفسها وتقول أن النقود التي تكسبها حرام، وما تفعله في السيدات حرام.

أوضحت: “في آخر حلقة لقيت دكتور بيقولي دي الحباية الذكية، قلت له بتعمل إيه؟، قالي أصل دي حضرتك هتاخديها فأنتي لو تخينة من هنا هتنزل تخسسلك من هنا، تهريج تهريج، اليوم ده روحت البيت ضميري مأنبني”.

أكدت على أنها من هنا قررت أنها لن تعود للتلفزيون مرة أخرى إلا إذا وجدت شخص يعرض عليها برنامج مثل ما كانت تفعله قديما.

استكملت: “قلت أنا هركز على السوشيال ميديا، ما أنا أكيد بكسب من السوشيال ميديا بس إعلانات أنا اللي مختاراها بيجيلي كريمات قد كده بقول لا لا لا أنت أوك، لأن أنا عارفة إن الستات هتشتريها”.

في سياق آخر كانت أمينة شلباية، خبيرة التجميل، قد نشرت فيديو على قناتها الرسمية على موقع “يوتيوب“، توضح فيه طريقة تناول الآيس كريم وفق قواعد الإتيكيت.

قالت “شلباية“ إنه يوجد إتيكيت بالطبع لتناول حلوى الآيس كريم، لافتة إلى أنه لا يجب تناوله بشكل عشوائي، موضحة: “بلاقي الناس واخدة بالمعلقة حتة من هنا وحتة من هنا ده مرفوض خالص لو حد عايز يدوق عشان يعرف هو حابب نكهة إيه يبقى يدوق بالاستيك الخشب الأول“.

تابعت أنه من الأفضل أن يكون لكل نكهة (استيك) خاص بها، مشيرة إلى أنه بعد تحديد النكهات المفضلة يتم وضع الآيس كريم بملعقته الخاصة في طبق، ويتم وضع الملعقة في صحن الآيس كريم وليس على المائدة بعد الانتهاء، لافتة: “أرجوكم بلاش حد يلحس المعلقة أو يدخلها ويطلعها في بوقه وبلاش تقلبوا الآيس كريم في الطبق“.

أردفت: “بلاش حد يشرب الآيس كريم اللي في الآخر أو يدخل بوقه في البولة ده كله مرفوض، الآيس كريم بيتاكل بشكل طبيعي بالمعلقة ولما يخلص بسيب المعلقة في البولة وبمسح بوقي بعدها بمنديل وبحطه على شمال الطبق“.

أشارت إلى أن طريقة تناول الآيس كريم في الطبق تختلف عن طريقة تناول الآيس كريم الميني، موضحة: “مفيش مشكلة لو أخدت الآيس كريم الميني بإيدي لكن يكون في طبق تحتها أو ألف منديل على الاستيك بتاعه، وهو قطمة أو قطمتين مفيش أدخله وأطلعه من بوقي أو ألحسه، ولما أخلصه أحط الاستيك في الطبق“.

بالنسبة لطريقة تناول الآيس كريم الكون، قالت “شلباية“: “مش بيتلحس ولا بيتاكل من تحت أنا بجيب طبق ومعلقة الآيس كريم وببدأ أكله من على الوش ولما يخلص أبدأ أكل بسكوت الكونو نفسه“.