أبرزها موقفه من ترك نادي الزمالك.. 15 تصريحا لـ زيزو
15 تصريحا لـ زيزو
حل اللاعب أحمد سيد زيزو، لاعب نادي الزمالك، ضيفا على برنامج “الحكاية” مع الإعلامي عمرو أديب، المذاع عبر شاشة “mbc مصر”، أمس الجمعة.
تحدث “زيزو” خلال اللقاء عن موقفه من ترك نادي الزمالك بعد تلقيه عروضا للاحتراف خارج مصر، وعلاقته بالمدرب جوسفالدو فيريرا، المدرب الحالي للنادي، وطريقته في تدريبهم، مرورا برده على شائعات خلافه مع شيكابالا.
نرشح لك: زيزو: فيريرا علمنا الكورة من أول وجديد
وفيما يلي أبرز تصريحات زيزو في برنامج “الحكاية”:
١- “فيريرا” دربنا على أساسيات لعب الكرة كالتمرير وكيفية الوقوف في الملعب، وهو الأمر الذي أثار استغرابنا في البداية لكننا اكتشفنا أهميته فيما بعد،“فيريرا هو فعلا معلم وبروفيسور وهو فعلا “البابا” وباقي المدربين أحفاده، وزرع في لاعيبة الزمالك إننا نصدق إننا نقدر نعمل حاجة”.
٢- “لما جه كابتن فيريرا شال عننا الضغوطات وقالنا إلعبوا براحتكم مش مهم الدوري، وكمان مجلس الإدارة الجديد لما جه عملوا استقرار للنادي وبقى في استقرار ذهني على الأقل للاعيبة، وقدرنا ندي كل حاجة في الملعب”.
٣- “متقارنش لاعيبة نادي الزمالك بلاعيبة نادي تاني عشان أنت بتلعب في نادي كبير، قارن الاستقرار ومجلس الإدارة اللي بيتغير كل 3 شهور عندنا، إديني نفس الظروف والمقومات وبعدين قارن”.
٤- “هعمل إيه؟ معرفش، لكن بتمنى إيه؟ أتمنى أفضل في الزمالك، لكن الإحساس اللي وصلتله والمكانة اللي وصلتلها عند جماهير نادي الزمالك والوضع اللي خدته ميتعوضش، لكن أنا اختياري الأول إني أقعد في الزمالك، لكن في النهاية القرار في إيد النادي”.
٥- لن أفعل الشرط الجزائي “2 مليون دولار” رغم عروض بعض الأندية وأي احتراف سيكون بموافقة نادي الزمالك، وهناك جلسة ستعقد للاتفاق بين والدي والمستشار مرتضى منصور.
٦- “أنا لما والدي سألني عاوز إيه قلتله الزمالك رقم واحد، وحطينا بعدها تاني وتالت حاجة وهو يقرر، لكن لما تلاقي الاستقرار اللي حاصل في نادي الزمالك، والفريق مع بعض بقالنا 4 سنين كمان، وأكيد في جزء فيا عاوز يحترف بره بس في حاجات بتغلب حاجات”.
٧- احترافي لو تم سيكون خارج مصر، ومن الصعب الانضمام للنادي الأهلي ومكانتي في الزمالك لا يمكن التنازل عنها.
٨- كارلوس كيروش كان مدرب جيد وليس لدي مشكلة شخصية مع مدرب لا يشاركني في المباريات، “أنا عندي مشكلة إني مبعرفش أقعد أنا بحترم قرار المدرب بس حتى في الإجازة مبقدرش أقعد”.
٩- بيتسو موسيماني مدرب النادي الأهلي بالأرقام مدرب جيد فهو حصل على بطولة أفريقيا مرتين وحصد المركز الثالث في كأس العالم للأندية لذلك هو مدرب جيد.
١٠- “في حاجة معينة لازم أعملها كل ماتش، أيلا بنتي بتختار لي اللبس، بفتح لها الجزامة وهي بتختار الشوز، لو أنا لبست حاجة وهي قالت لي لا ممكن مجبش جون الماتش ده.. وتختار لي ساعة معينة أروح بيها معسكر، دي الحاجة اللي بتفائل بيها دايما قبل كل ماتش”.
١١- “سيبني أفرح بالطريقة اللي أنا عايزها أنا يا عم محروم عادي، هو أنت الحاجة اللي بتكسبها كتير لما بتكسبها تاني مبتبقاش مبسوط؟ بتفرح تاني عادي، أنا واحد مبكسبش حاجة كتير لما كسبتها بقيت مبسوط أنا لما بفرح مع الجمهور بحس بقيمة التعب اللي أنا تعبته”.
١٢- “الزمالك بيلعب على 4 بطولات أنا بتمنى نكسب الأربعة، ولو رحنا كأس العالم للأندية دي نقلة للاعيبة، أنا بتمنى نكسب كل البطولات لكن هنكسب بطولة دي بترجع أنت تعبت قد إيه، وتوقعي إن شاء الله ناخد الدوري السنة الجاية”.
١٣- “الناس فاكرة أن موضوع الاحتراف دا فشل بالنسبة لي، لا الموضوع مفشلش خالص، أنت واحد في أوروبا أكتر من 250 في خمس سنين، وفي الوقت كنت بلعب في نص الملعب، فمكنش دوري أجيب جوان”.
١٤- “فكرة الأب اللي وراك اللي فاهم ده حاجة مهمة جدا حياة الشخص من غيره في حاجات كتير كنت هحسبها غلط ومكنتش هوصل للي وصلت له دلوقتي أنا شكرته كتير وبحب أشكره تاني”.
١٥- “محمد صلاح قالي من المعسكر اللي فات واللي قبله إني لازم أحترف دلوقتي، وقالي لازم أشوف وكيل كبير وأطلع بره، عشان ممكن أعمل كارير حلو أوي لأن إمكانياتي كويسة تخليك تلعب في أندية كبيرة أوي”.
كان اللاعب أحمد سيد زيزو، فاز بلقب هداف الدوري المصري الممتاز لموسم 2021-2022، ليصبح عاشر لاعب من الزمالك يحقق الجائزة.