محمد الباز لـ نهاد أبو القمصان: لا نتزوج من جواري!
وجه الإعلامي محمد الباز، رسالة إلى المحامية نهاد أبو القمصان، بعد إثارتها الجدل حول الحديث عن حق المرأة في أجر الرضاعة.
قال “الباز” خلال تقديم برنامج “آخر النهار”، مساء الأحد، المذاع عبر فضائية “النهار”: “رسالة لنهاد أبو القمصان، وهبة قطب وسعاد صالح، بعد حديثهم عن أجر الرضاعة وأن المرأة مش ملزمة بالخدمة، أنا أعرف أن نهاد تناصر قضية المرأة لكن ما تفعله احتقار للمرأة بتتعامل مع جارية وليس مع زوجة، وإحنا مبنتجوزش جواري، بنتجوز زوجات شركاء في الحياة”.
نرشح لك: نهاد أبو القمصان: كلامي عن “أجر الرضاعة” موجه لدعاة تعدد الزوجات
كانت المحامية نهاد أبو القمصان، عضو المجلس القومي لحقوق الإنسان، علقت على الجدل الذي أثير مؤخرا، حول أجر الرضاعة. وكتبت عبر حسابها على موقع “فيس بوك“: “أصحابي وحبايبي بيقولوا لى مش فاهمين ايه موضوع أجر الرضاعة ده؟ ومناسبته ايه؟ أفهمكوا يا حبايبي.. الراجل اللي بياخد حته من القرآن ويسيب الباقي بنفكره بباقي القرآن لأنه ربنا عادل والقرآن أنصف المرأة ومليان حقوق هنعرفها للستات كلها إن شاء الله”.
تابعت: “يعنى اللي يقول لمراته هتجوز عليكي وده حقي والشرع بيقول مثنى وثلاث، نقوله طب يا حبيبي براحتك ادفع اللي عليك الأول، حقوق الستات اللي ربنا قال عليها في القرآن والشرع برضو من أول المهر للإنفاق على كل حاجة حتى أجر الرضاعة”.
أضافت: “والراجل الجدع اللي يحسس الست بالأمان ويعاملها بالمودة والرحمة ويعتبرها شريكته وحبيبته، هنقول له ونقول للستات (لا تنسوا الفضل بينكم)، وكمان (ولهن مثل الذي عليهن بالمعروف) وكل ست تشيل جوزها الجدع في العين والنني كمان، ومتنازلين عن أجر الرضاعة.. خلص الكلام”.