ضمن احتفالية مبادرة "واحدة جديدة".. نصيحة رضوى الشربيني للسيدات

نصيحة رضوى الشربيني للسيدات
هالة أبو شامة

وجهت الإعلامية رضوى الشربيني، نصيحة للسيدات حثتهن فيها على ضرورة تطوير الذات والسعي الدائم لمعرفة السبب الذي خلقن لأجله للعمل عليه وتنميته.

قالت “الشربيني” خلال الكلمة التي أدلت بها ضمن احتفالية مبادرة “واحدة جديدة” التي أقيمت مساء الأربعاء، وسط حضور كثيف للعديد من الشخصيات البارزة، إنه لا بد لكل سيدة وفتاة أن تكون مؤمنة بأن كل ما يحدث في حياتها هو لسبب ما، وذلك السبب أوجده الله لتعليمها ولنفعها.

نرشح لك: ليس مفخرة.. رد محمد أبو بكر على تصريحات رضوى الشربيني حول الطلاق

وعلقت: “أي كان اللي بيحصلي في حياتي لازم يكون عندي ثقة وإيمان كامل إن ربنا سبحانه وتعالى بيعملي كل الخير عشان رب الخير مبيعملش إلا الخير، لكل واحدة ولكل واحد فينا في حياته، وعشان ابقى واحدة جديدة ، لازم اعرف انا اتخلقت ليه، كل واحدة اتخلقت عشان سبب، واحدة ممكن تكون اتخلقت عشان أم عظيمة تجيب شخصية مبهرة وناجحة زي الدكتور مجدي يعقوب، واحدة تانية ممكن تكون وزيرة، واحدة ممكن تكون سفيرة أو إعلامية”.

في نفس السياق، كشفت عن سبب نجاحها كإعلامية حيث قالت: “أنا ربنا خلقني ليه، أنا مش مخلوق اتخلقت عشوائي، أنا طلعت بني آدم طلعت ست، ولما اعرف انا اتخلقت ليه ، هعرف أكون واحدة جديدة، هعرف أكون عندي الإيمان الكامل إني مش هعرف أنجح لوحدي، مفيش حد بيعرف ينجح لوحدة، أنا مبقتش رضوى الشربيني لوحدي، لو مكنش عندي ناس بتدعمني وتساعدني وواقفة في ضهري عمري ما كنت هبقى رضوى الشربيني، فلازم اعرف مين الناس اللي حواليا واختارهم بمنتهى العناية والدقة عشان هي الناس دي اللي هتخليني واحدة جديدة”.

أضافت أنه لا بد من أن نكون على دراية بأهمية تصحيح المسار حينما نشعر بأن الطريق الذي نسير فيه لا يناسبنا، حيث قال: “لازم يبقى عندي فكرة تصحيح المسار، دايما الدنيا بتوديني في حته وبتخليني أفتكر إن دي الحتة اللي اتخلقت لها، على الرغم من أنها مبتبقاش هي دي الحقيقة، الحقيقة يبقى في حتة تانية أحلى وأجمل، فلازم يبقى في فكرة تصحيح المسار”.

يشار إلى أن مبادرة “واحدة جديدة” تقام تحت رعاية وزارة التضامن الاجتماعي، وتلقي الضوء على قوة النساء وقدرتهن على مواجهة التحديات والظروف الصعبة.

وشهدت الاحتفالية توزيع جوائز الموسم الثاني للمبادرة وتكريم أفضل 10 سيدات ملهمات، فيما اختتمت الفنانة هلا رشدي الحفل، بفقرة غنائية قدمت فيها العديد من الأغاني.